مەسعود پزیشکیان: کاری لەپێشینەی کابینەکەم باشترکردنی پەیوەندییەکانە لەگەڵ وڵاتانی دراوسێ

 

 

دوای سوێندخواردنی، مەسعود پزیشکیان گوتارێکی پێشکێش کرد و تێیدا حکومەتەکەی بە "حکومەتی هاودەنگیی نیشتمانی" ناوبرد و گوتیشی، "چواردەیەمین حکومەتی ئێران دەرفەتێکی نوێی رەخساندووە؛ دەرفەتێک بۆئەوەی گوێ لە هەموو ئێرانییەکان بگیرێت کە داوای گۆڕانکاری دەکەن."

 

پزیشکیان بەڵێنی باشترکردنی دۆخی ئابووریی ئێران و باشترکردنی ژیانی هاووڵاتییانی وڵاتەکەی دا و گوتی، "خەڵک سەرەڕای جیاوازیی خولیایان، جیاوازیی نەتەوایەتی، جیاوازیی ئایینی و جیاوازیی جێندەری فاکتەری سەرەکی پێشکەوتنەکانی وڵاتن. حکومەتی چواردەیەمین بەڵێنی کارکردن بۆ پێشخستنی ئێران، باشترکردنی ئابووری و بەرەوپێشبردنی ژیانی خەڵکی دەدات."

 

پزیشکیان کە دەبێت لە دوو هەفتەی داهاتوودا کابینەی حکومەتەکەی رابگەیێنێت، لە گەڕی دووەمی هەڵبژاردنی سەرۆکایەتیدا زیاتر لە 16 ملیۆن دەنگی بەدەستهێنا، کە دەکاتە نزیکەی 54%ی دەنگی بەشداربووان.

 

دەستبەکاربوونی سەرۆکی نوێی ئێران لە کاتێکدایە، ناوچەکە بەهۆی جەنگی غەززەوە رووبەڕووی ناسەقامگیری بووەتەوە و کێشەکانی ئێرانیش لەگەڵ رۆژئاوا لەسەر پڕۆگرامی ئەتۆمی بەردەوامن.

 

 

پزیشکیان لەبارەی پەیوەندی وڵاتەکەی لەگەڵ وڵاتانی دیکە قسەی کرد و گوتی، دەیەوێت کار بۆ باشترکردنی بکات. 

 

پزیشکیان لەوبارەیەوە گوتی، "کاری لەپێشینەی کابینەکەی من بەهێزکردن و باشترکردنی پەیوەندییەکانمانە لەگەڵ وڵاتانی دراوسێ. نابێت وڵاتانی دراوسێ تواناکانی خۆیان لە رکابەری و گرژی لەگەڵ یەکدی بەفیڕۆ بدەن."

 

سەرۆککۆماری ئێران ئاماژەی بەوەش کرد، "کابینەکەی من خوازیاری رۆژهەڵاتی نێوەڕاستێکی بەهێزە؛ ناوچەیەک کە تێیدا هەموو وڵاتانی دراوسێ بتوانن بە پەرەپێدانی پەیوەندییەکانیان، لە پێناو گەشەی ئابووری و پێشکەوتنی نەوەکانی داهاتوودا پێکەوە هەنگاو بنێن؛ ناوچەیەک کە ئاسایشەکەی بە دەستی وڵاتانی ناوچەکە خۆیان دەستەبەر بکرێت و هێزە بیانییەکان بیانووی مانەوەیان نەمێنێت."

 

 

پزیشکییان ئامادەیی حکومەتی وڵاتەکەی بۆ گفتوگۆ لەگەڵ رۆژئاوا لەبارەی هەڵگرتنی سزاکانی سەر وڵاتەکەی دەربڕی و ئاماژەی بەوەشکرد، "پڕۆگرامی چەکی ئەتۆمی ئێران بۆ مەبەستی ئاشتییە."

 

سەرۆککۆماری نوێی ئێران گوتی، "وڵاتانی رۆژئاوا بۆ تێگەیشتن لە راستی و دروستکردنی پەیوەندی لەسەر بنەمای رێزگرتنی دوو لایەنە و پێگەی یەکسان بانگهێشت دەکەین. ئامادەین بۆ کۆنترۆڵکردنی گرژییەکان لەگەڵ ئەو وڵاتانەی کە هێشتا لە پێگە و هێزی ئێران تێنەگەیشتوون، گفتوگۆ بکەین."

 

پزیشکیان ئاماژەی بەوەش کرد، "گوشارەکان و سزاکانی سەر ئێران ئەنجامیان نابێت" و "ئێران بەردەوام لەلای راستی مێژوو وەستاوە"؛ گوتیشی، "ئێران وڵاتێکی سەلامەت، یەکگرتوو و سەقامگیرە."

 

ئێران و زلهێزەکانی جیهان لە ساڵی 2015 رێککەوتنێکی ئەتۆمییان واژۆکرد بۆ ئەوەی ئێران چالاکییە ئەتۆمییەکانی سنووردار بکات و لە بەرامبەر ئەوەدا سزاکانی سەری هەڵبوەشێنرێنەوە،  بەڵام ساڵی 2018 ئەمریکا لەسەر دەستی دۆناڵد ترەمپ، سەرۆکی ئەو کات لێی کشایەوە و سزاکانی بەسەردا سەپاندەوە.

 

لەو کاتەوە ئێران دەستی بە بەرزکردنەوەی ئاستی پیتاندنی یۆرانیۆم کردووە، بەڵام رەتیدەکاتەوە هەوڵی بەدەستهێنانی چەکی ئەتۆمی بدات و دەڵێت، بەرنامە ئەتۆمییەکەی تەنیا بۆ بەرهەمهێنانی وزەی کارەبا و مەبەستە سڤیلەکانی دیکەیە.

 

 

رێوڕەسمی دەستبەکاربوونی سەرۆککۆماری نوێی ئێران لەکاتێکدایە، هەڕەشەی ئیسرائیل و حیزبوڵڵای لوبنانی لە یەکدی گەیشتووتەوە لووتکە.

 

سەرۆککۆماری ئێران لە گوتارەکەیدا رەخنەی لە کۆنگرێسی ئەمریکا گرت بەهۆی ئەوەی کۆتایی هەفتەی رابردوو پێشوازی لە بنیامین نەتەنیاهوو، سەرۆکوەزیرانی ئیسرائیل کرد و گوتی، "هیچ کەسێک ئەوە قبووڵ ناکات کە سەرۆکی رژێمێک کە لە غەززە ژن و منداڵ دەکوژێت لەلایەن ئەندامانی کۆنگرێسەوە پێشوازی لێبکرێت."

 

لە رێوڕەسمەکەدا محەممەد باقر قالیباف، سەرۆکی پەرلەمانی ئێرانیش گوتارێکی پێشکێش کرد و تێیدا بە تووندی رەخنەی لە ئیسرائیل گرت لە بەرامبەر ئەو ئۆپەراسیۆنە سەربازییەی لە غەززە دەیکات.