ئێران بودجەی سەربازی 200% زیاد دەکات

 

 

رۆژی سێشەممە 29-10-2024 فاتیمە موهاجیرانی، گوتەبێژی حکومەتی ئێران لە کۆنفرانسێکی رۆژنامەڤانیدا لە تاران رایگەیاند، حکومەتی وڵاتەکەی هەنگاوێکی گرتووەتەبەر کە خۆی لە "زیادکردنی زیاتر لە 200% بودجەی سەربازیدا دەبینێتەوە."

 

گوتەبێژی حکومەتی ئێران گوتی، "هەموو هەوڵێک بۆ پڕکردنەوەی پێداویستییەکانی بەرگری دراوە."

 

ئەم ساڵ بودجەی سەربازیی ئێران 469 تریلیۆن تمەن بوو و بەو پێیە ساڵی داهاتوو بودجەی سەربازیی ئێران دەگاتە 938 تریلیۆن تمەن کە دەکاتە نزیکەی 15 ملیار دۆلار.

 

هەنگاوەکەی ئێران بۆ زیادکردنی بودجەی سەربازی لە کاتێکدایە، جەنگێک بەشێکی رۆژهەڵاتی نێوەڕاستی گرتوەتەوە و ئێرانیش بووەتە بەشێک لێی.

 

رۆژی شەممە 26-10-2024، ئیسرائیل هێرشی کردە سەر ئێران. بەگوێرەی سوپای ئیسرائیل، لە هێرشەکەدا شوینی دروستکردنی ئەو درۆن و مووشەکانە بەئامانجگیراوە کە ئێران لە هێرشەکانی بۆ سەر ئیسرائیل بەکاریهێناون.

 

سوپای ئیسرائیل رایگەیاند هێرشەکەیان بە "سەرکەوتوویی" ئەنجامداوە و فڕۆکەکان گەڕاونەتەوە شوینی خۆیان.

 

دواتر ئێران رایگەیاند، زۆربەی هێرشەکان لەلایەن سیستمی بەرگریی وڵاتەکە بەرپەچدراونەتەوە  و زیانێکی "سنووردار" بە وڵاتەکە گەیشتووە.

 

ئێرانیش 01-10-2024 بە نزیکەی 200 مووشەک هێرشی کردە سەر ئیسرائیل.