نێچيرڤان بارزانى سه‌ردانى تاران ده‌كات

 

سەرۆکایەتیی هەرێمی کوردستان دەڵێت، سبەی سێشەممە، 30-07-2024، نێچیرڤان بارزانی، سەرۆکی هەرێمی کوردستان بە بانگهێشتی فەرمی، سەردانی تاران دەکات و لەگەڵ سەرکردە و بەرپرسانی باڵای وڵاتانی دیکە، بەشداریی لە رێوڕەسمی سوێندخواردن و دەستبەکاربوونی مەسعود پزیشکیان، سەرۆککۆماری هەڵبژێردراوی ئەو وڵاتە دەکات.

 

بەپێی دەستووری ئێران، دوای پێدانی بەڵگەی دەستبەکاربوونی لەلایەن رێبەری کۆماری ئیسلامیی ئێرانەوە، رێوڕەسمی سوێندخواردنی سەرۆککۆمار بە ئامادەبوونی سەرۆکی دادگەی باڵا، ئەندامانی ئەنجوومەنی پاراستنی دەستوور، سەرۆکی دەسەڵاتی دادوەری و بەرپرسانی دیکەی نیشتمانی و سەربازی، لە پەرلەمانی ئەو وڵاتە بەڕێوەدەچێت.

 

14یەمین خولی هەڵبژاردنی سەرۆککۆماریی ئیران لە دوو گەڕدا بەڕێوەچوو و لە گەڕی دووەمدا کە لە 5ـی تەمموزی 2024 کرا، زیاتر لە 30 ملیۆن و 573 هەزار کەس لە نێوخۆ و دەرەوەی ئێران بەشدارییان لە هەڵبژاردنەکەدا کرد کە پزیشکیان 16 ملیۆن و 384 هەزار و 403 دەنگی بەدەستهێنا و بووە نۆیەمین سەرۆککۆماری ئێران.

 

رۆژی یەکشەممە، 28-07-2024، مەسعود پزیشکیان، سەرۆککۆماری هەڵبژێردراوی ئێران لە رێوڕەسمی واژۆکردنی بەڵگەنامەی دەستبەکاربوونی لەلایەن عەلی خامنەیی، رێبەری کۆماری ئیسلامیی ئێران، گوتارێکی پێشکێشکرد و، رایگەیاند ''هەموو ئەو کەسانەی دەنگیان بە من و بەربژێرانی رکابەرم دا، یان بەهۆی رەخنە و گلەییەوە بەشداریی هەڵبژاردن نەبوون، چاوەڕێی گۆڕانکاری لە من و حکومەتی داهاتوو دەکەن و لە ئەمڕۆوە کاتی وەڵامدانەوەیان دەستپێدەکات.''