ئەمریکا سزای نوێ بەسەر بەرنامەی بەرهەمهێنانی درۆنی ئێرانی دەسەپێنێت

رۆژی چوارشەممە، 27ـی ئەیلوولی 2023، وەزارەتی گەنجینەی ئەمریکا لە بەیاننامەیەکدا، سزای نوێی بەسەر تۆڕی بەرهەمهێنانی درۆنی ئێرانیدا سەپاند و رایگەیاند، ئەو تۆڕە هاوکاریی مادی بۆ کۆماری ئیسلامی ئێران دابین دەکات بە مەبەستی دروستکردنی درۆنی جۆری شاهید - 136. 

 

برایان نیڵسن، یاریدەدەری وەزیری گەنجینەی ئەمریکا بۆ کاروباری دارایی و تیرۆریزم گوتی، "درۆنەکانی ئێران ئامرازێکی گرنگن بۆ رووسیا لە هێرشەکانی دژی ئۆکراینا، لەنێویشیاندا ئەو هێرشانەی خەڵکی سڤیل و ژێرخانی ئۆکراینای کردووەتە ئامانج. ئێمە  بە هاوئاهەنگی لەگەڵ هاوبەش و هاوپەیمانەکانمان، بەردەوام دەبین لە لێپێچینەوە لەوانەی بەرپرسیارن لە دابینکردنی درۆن بۆ رووسیا و بریکارەکانیان لە رۆژهەڵاتی ناوەڕاست و هەموو ئەوانەشی، کە ناسەقامگیریی دروست دەکەن."

 

سزا نوێیەکانی ئەمریکا بەسەر پێنج دامەزراوە و دوو کەسایەتی سەپێندراون، کە رۆڵیان هەبووە لە بەرنامەی دروستکردنی درۆنی ئێرانی، سزادراوەکانیش لە ئێران، چین، تورکیا و ئیمارات پێکهاتوون. 

 

لەدرێژەی بەیاننامەکەی وەزارەتی گەنجینەی ئەمریکا، هاتووە، "واشنتن بەردەوام دەبێت لە فراوانکردنی گوشارەکان بۆ سەر ئێران و بەتایبەتیش لە رێگەی سزا ئابوورییەکانەوە، بە مەبەستی رێگە گرتن لە ئێران بۆ دروستکردنی ناسەقامگیری. ئەمریکا ئامانجیەتی رێگری لە تواناکانی ئێران بکات بۆ دروستکردن و پێشخستن و دابینکردنی چەکی پێشکەوتوو." 

 

بەگوێرەی وەزارەتی گەنجینەی ئەمریکا، لە ئەیلوولی 2022ـەوە، ئەم سزایە نۆیەم پاکێجی سزاکانی واشنتنە بەسەر بەرنامەی دروستکردنی درۆنی ئێرانیدا دەیسەپێنێت.