وەزیری دەرەوەی فەرەنسا داوا لە ئێران دەکات گیراوە فەرەنسییەکان ئازاد بکات

 

رۆژی چوارشەممە، 25-01-2023، ماڵپەڕی فەرمیی وەزارەتی دەرەوەی ئێران رایگەیاند: "ئەمیر حوسێن عەبدوڵاهیان، وەزیری دەرەوەی ئێران لە پەیوەندییەکی تەلەفۆنیدا لەگەڵ کاترین کۆڵۆنا، وەزیری دەرەوەی فەرەنسا رەخنەی لە سیاسەتی دەستوەردانی پاریس لە کاروباری ناوخۆی ئێران گرت و داوای کرد سیاسەتی شکستخواردووی دۆناڵد ترەمپ لە سەپاندنی سزا بەسەر تاران دووبارە نەکەنەوە".

 

رۆژی دووشەممە، 23-01-2023، یەکێتی ئەوروپا بڕیاریدا 37 جۆر سزا بەسەر ئەو کەسایەتی و دامەزراوانەی ئێراندا بسەپێنێت کە "رۆڵیان هەبووە لە سەرکوتی خۆپێشاندەران"، وەزارەتی دەرەوەی ئێرانیش نووسیویەتی: "ئەمیرحوسێن عەبدوڵاهیان بە وەزیری دەرەوەی فەرەنسای راگەیاندووە، ئێمەش ئەمڕۆ لە کاردانەوەیەکی هاوشێوە 33 کەسایەتی و دامەزراوەی یەکێتیی ئەوروپا و بەریتانیامان خستووەتە ناو لیستی سزادراوان".

 

وەزیری دەرەوەی ئێران رەخنەی لە هەوڵەکانی پەرلەمانی یەکێتتی ئەوروپا گرتووە بۆ "بە تیرۆریست ناساندنی سوپای پاسداران" و دەڵێت: "سوپای پاسداران دامەزراوەیەکی سەروەری و پارێزەری ئاسایسی نیشتمانی ئێرانە، بۆیە کۆماری ئیسلامیی ئێران بە وردی چاودێری هەنگاوەکانی ئەوروپا دەکات و هاوشانی ئەو هەنگاوانە رێکاری پێویست دەگرێتەبەر".

 

بەگوێرەی وەزارەتی دەرەوەی ئێران: "کاترین کۆڵۆنا بە هەموو شێوەیەک دەستوەردانی وڵاتەکەی لە کاروباری ئێران رەتکردووەتەوە و داوای لە تاران کرد ئەو هاونیشتمانییە فەرەنسیانە ئازاد بکات، کە لە چەند مانگی رابردوودا دەستگیری کردوون".

 

پێشتر وەزیری دەرەوەی فەرەنسا رایگەیاندبوو، حەوت هاونیشتمانیی فەرەنسی لە ناوخۆی ئێران گیراون و ئەو هەوڵەی ئێرانی بە هێرشکردنە سەر فەرەنسا ناوبرد و گوتی: "ئەمە جۆرێک لە بارمتە وەرگرتنە کە تاران لە پێناو گەیشتن بە ئامانجەکانی گرتوویەتەبەر" و لە بەرامبەریشدا وەزارەتی دەرەوەی ئێران ئەو دەستبەسەرکراوانە بە "سیخوڕ و دەستوەردان لە کاروباری ناوخۆ و وەستانەوە دژی ئاسایشی نیشتمانی ئێران" ناودەبات.