لە شنۆ پێنجەمین فیستیڤاڵی ساڵانەی گێلاس بەڕێوەدەچێت

 

خەلیل پووروەهابی، خاوەن باخی گێلاس دەڵێت: "بەداخەوە فیستیڤاڵی گێڵاسی ئەمساڵ لەگەڵ ساڵی رابردوو ئەرز و ئاسمان جیاوازی هەبوو، یەک لەبەر شوێنەکەی، چونکە ئەم شوێنە گونجاو نییە کە هەڵیانبژاردووە، هۆکارێکی دیکەش ئەوەیە کە خەڵک لەبەر ئەم تەپوتۆز و گەرمایە نەیتوانیوە بێت، ئەمەش وایکردووە بازاڕەکە خراپ بێت."

 

جگە لە جێگە و کەشوهەوا، بایکۆتکردنی فیستیڤاڵەکە لە لایەن چالاکڤانانی مەدەنی شنۆوە، هۆکارێکی دیکەی بێ برەوبوونی پێنجەمین خولی فیستیڤاڵی گێلاس بوو. لە چوار خولی پێشوودا، چالاکڤانان و دامەزراوە حکومییەکان پێکەوە فیستیڤاڵەکەیان بەڕێوەدەبرد، بەڵام ئەمساڵ بەو شێوەیە نەبوو و، هەموو کاروبارەکانی لە لایەن دامودەزگا حکومییەکانەوە کرابوو، بۆیە چالاکڤانانی شنۆ بایکۆتیان کرد. 

 

بەفرین عوسمانی، فرۆشیارە و باسی لەوە کرد: "فیستیڤاڵەکە گەورەیە، بەڵام بەداخەوە شوێنەکە گونجاو نییە، ئەو تەپۆتۆزەش ژینگەکەی تێکداوە، بەتایبەت ئێمە چاوەڕێ بوون شوێنێکی باشتر دەستنیشان بکرێت."

 

پێشبینیکراوە لە 498 هێکتار باخی گێلاسی شنۆ، ئەمساڵ چوار هەزار و 83 تۆن گێلاس بەرهەمبێت. ئامانجی فیستیڤاڵە ناساندنی زیاتری بەرهەمی گێلاسی شنۆ، ئاوڕدانەوە لە کێشەکانی خاوەن باخ و فرۆشیاران و بە بازاڕکردنی باشتری بەرهەمەکەیە، بەڵام  بەشداربووانی فیستیڤاڵەکە دەڵێن، ئەمساڵ فیستیڤاڵی گێلاس ئامانجی نەپێکاوە.

 

ئەکبەر محەممەدی، خاوەن باخی گێلاس گوتی: "پێمخۆشە شتەکەی بڵاوبکەنەوە و بیکەنە ئینتەرنێتی، ساڵێکی دیکەش دابنرێتەوە و، گەورەتر، جوانتر و رێکوپێکتریش بکرێت."

 

فیستیڤاڵی گێلاسی شنۆ تەنیا بۆنەیەک نییە بۆ گرنگیدان بەو میوە بەهارییە، بە جۆرێک رێوڕەسمێکی کولتووری و هونەریشە. هەوڵدەدرێت لەو رێگەیەوە سەرنجی بەشداربووان بۆ دابونەریت، کولتوور، ژینگە و توانا گەشتیارییەکانی ئەو شارە رابکێشرێت.