کاربەڕێکەری باڵیۆزخانەی بەریتانیا بانگهێشتی وەزارەتی دەرەوەی ئێران کرا

 

وەزارەتی دەرەوەی ئێران لە راگەیێندراوێکدا دەڵێت، لە بەرامبەر سزا نوێیەکانی بەریتانیادا، کاردانەوەی پێشانداوە و ئاماژە بەوە دەکات، "سزاکانی بەریتانیا دژی ئێران نایاسایین و هیچ پاساوێکیان نییە". 

 

لە راگەیێندراوەکەدا هاتووە، "دوابەدوای سەپاندنی سزا نایاساییەکان لە لایەن بەریتانیاوە بەسەر ژمارەیەک کەسایەتی و دامەزراوەی ئێران، لەوانەش کۆمپانیای کەشتیوانیی کۆماری ئیسلامیی ئێران و ئیران ئێیەر، بە پاساوی ناردنی مووشەکی بالیستی بۆ رووسیا، کاربەڕێکەری باڵیۆزخانەی بەریتانیا لە تاران بانگهێشتی وەزارەتی دەرەوەی ئێران کرا و ناڕەزایەتیی تووندی ئێرانی لە بەرامبەر ئەو هەنگاوە نایاساییە و پاساوهەڵنەگرەی حکومەتی بەریتانیا پێ راگەیێندرا". 

 

بە گوێرەی راگەیێندراوەکە، عەباس نادری، یاریدەدەری بەڕێوەبەری گشتیی کاروباری رۆژئاوای ئەورووپا لە وەزارەتی دەرەوەی ئێران بە تووندی ئەو کارەی بەریتانیای سەرکۆنە کردووە و پێی راگەیاندووە، سزا نوێیەکانی بەریتانیا "پێچەوانەی یاسا نێودەوڵەتییەکانن و تێکدانی پرەنسیپی ئازادیی کەشتیوانی و بازرگانی دەریایین".

 

رۆژی دووشەممە، حکومەتی بەریتانیا سزای نوێی بەسەر ئێراندا سەپاند، ئەوەش بە تۆمەتی ناردنی مووشەکی بالیستی و چەکی دیکە بۆ رووسیا بۆ پاڵپشتیکردنی سوپای ئەو وڵاتە لە شەڕی دژی ئۆکرانیا.

 

سزاکە کۆمپانیای کەشتیوانیی کۆماری ئیسلامیی ئێران و کۆمپانیای ئێران ئێیەری گرتەوە.

 

عەباس نادری رەتیدەکاتەوە، ئێران مووشەکی بالیستی بۆ رووسیا ناردبێت و دەڵێت، "هاوکاریی رەوا و یاسایی کۆماری ئیسلامیی ئێران لەگەڵ وڵاتانی دیکە لە بوارەکانی بەرگری و ئاسایش دژی هیچ لایەنێکی دیکە نین". 

 

ئەو بەرپرسەی وەزارەتی دەرەوەی ئێران دەشڵێت، "دەستوەردانی بەریتانیا و وڵاتانی ئەورووپا لە بواری هاوکارییە بەرگرییەکانی ئێران لەگەڵ وڵاتانی دیکە نایاساییە و بە هیچ شێوەیەک پەسندکراو نییە."

 

عەباس نادری هۆشداری دەدات کە هەنگاوەکەی بەریتانیا بەرامبەر ئێران بێ وەڵام نامێنێتەوە و بەرپرسیارێتی لێکەوتەکانی لە ئەستۆی لەندەنە.