دادی ئێران داوای "نەرمی نواندن" لە سزای باڵاپۆشی دەکات

 

 

غوڵامحوسێن موحسینی ئیژەیی، سەرۆکی دەسەڵاتی دادی ئێران رۆژی پێنجشەممە لە کۆبوونەوەی وەرزیی ئەندامانی ئەنجومەنی باڵای دادوەری لەگەڵ بەرپرسانی داد و داواکاری گشتیی پارێزگاکانی ئەو وڵاتە، جەختی لە چەسپاندن و جێبەجێکردنی یاساکان لە بواری باڵاپۆشیدا کردەوە و رایگەیاند، بەڵام دەبێ بە پلان و هاوئاهەنگی هەموو دام و دەزگەکانی پەیوەندیدار بێت.

 

ئەو گوتی: "سەبارەت بە پرسی پاکداوێنی و باڵاپۆشی و لێپرسینەوە لەگەڵ پێشێلکاران، پێویستە بە پلان، هاوئاهەنگی و هاوکاری کار بکرێت، بە دڵنیاییەوە نامانەوێت سزای هەر کەسێک بدەین کە لە سەر شەقام گرنگی پێویست بە یاساکان نادەن؛ لەو چوارچێوەیەدا کۆمیتەی پاکداوێنی و باڵاپۆشی لە وەزارەتی ناوخۆ، بەرپرسیارێتی لەسەرە."

 

سەرۆکی دەسەڵاتی دادی ئێران دەڵێت بۆ دام و دەزگە ئەمنی و هەواڵگرییەکان جەختیان لەوە کردووەتەوە کە پێویستە ئەوانەی بە شێوەیەکی رێکخراو پێشێلی رێسا و یاساکان دەکەن، بناسێندرێن. رێوشوێن بەجۆرێک بگیرێتەبەر کە لەم پرسەدا (باڵاپۆشی) رێگری لە پێشێلکردنی شەریعەت بکرێت و هەمیش نەبێتە زەمینەی خراپبەکارهێنان لەلایەن "دووژمنانەوە."

 

غوڵامحوسێن موحسینی ئیژەیی، لەگەڵ ئەوەدا نییە، هەندێک سزا بەسەر ئەو کەسانە بسەپێندرێت، کە پابەندی باڵاپۆشی نابن، لەوانە دەستبەسەرداگرتن و بلۆککردنی 'کۆدی نیشتمانی' داواشی لە دادوەرەکان کرد کە لە جیاتی سزای زیندانیکردن، لە چوارچێوەی یاسادا سزای دیکەیان بدەن "بە مەرجێک گونجاو بن و کاریگەری نەرێنی و زیانبەخشیان نەبێت."

 

حکومەتی ئێران لەم رۆژانەی دواییدا سەبارەت بە پرسی باڵاپۆشی ژنان سیاسەتێکی تووندی گرتووەتەبەر و هەوڵەکانی بۆ جێبەجێکردنی رێسا و یاسا ئایینیەکانی تایبەت بە باڵاپۆشی چڕتر کردووەتەوە، لەو چوارچێوەیەشدا لە زۆربەی شارە گەورەکانی ئەو وڵاتە پۆلیسی ئەخلاقی چالاک کردووەتەوە و ژمارەیەکی زۆری پۆلیس و هێزی ئەمنی لە شوێنە گشتییەکان بڵاوەیان پێکراوە.