کوردێکی سوننە کرایە ئەندامی ئەنجوومەنی بەڕێوەبردنی قۆناخی راگوزەری ئێران

 

 

بە بڕیاری مەسعود پزیشکیان، سەرۆککۆماری هەڵبژێردراوی ئێران، محەممەدرەئوف قادری، پەرلەمانتاری پێشووی پاوە، جوانڕۆ، روانسەر و سەلاسی باوەجانی وەکو ئەندامی سەرەکیی ئەنجوومەنی بەڕێوەبردنی قۆناخی راگوزەر دەستنیشانکرا.

 

محەممەدرەئوف قادری ساڵی 1963 لە روانسەری پارێزگای کرماشان لەدایکبووە و لە خولی پێنجەمی پەرلەمانی ئێران، لە نێوان ساڵەکانی 1996 تاوەکو 2000، پەرلەمانتاری شارەکانی پاوە، جوانڕۆ، سەلاسی باوەجانی و روانسەر بووە. قادری هەروەها یەکێک بوو لە ئەندامانی خولی یەکەمی ئەنجوومەنی بەڕێوەبەریی بەرەی یەکگرتووی کورد کە ساڵی 2005 دامەزرا. لە ساڵانی دواتریشدا لەنێو رەوت و حیزبە سیاسییە ریفۆرمخوازەکانی ئێراندا چالاک بووە.

 

محەممەدرەئوف قادری ساڵی 2023 و بۆ خولی دوازدەیەمی پەرلەمانی ئێران لە بازنەی پاوە، جوانڕۆ، سەلاسی باوەجانی و روانسەر خۆی بەربژێر کردبوو، بەڵام دەنگی پێویستی بەدەستنەهێنا. لە کەمپینی هەڵبژاردنی مەسعود پزیشکیانیشدا وەکو بەرپرسی کاروباری نەتەوە و سوننە مەزهەبەکان دیاریکرابوو.

 

جەلال مەحمودزادە، راوێژکاری مەسعود پزیشکیان لە کاتی بانگەشەی هەڵبژاردندا و پەرلەمانتاری پێشووی مهاباد ئەمڕۆ پێنجشەممە لە تۆڕی کۆمەڵایەتیی ئێکس رایگەیاند، مەسعود پزیشکیان بڕیاریداوە لە پێکهاتەی ئەنجوومەنی بەڕێوەبردنی قۆناخی راگوزەردا کەڵک لە چەند کەس لە شارەزایانی سوننە و کورد وەربگرن.

 

هەروەها جەلال جەلالیزادە، پەرلەمانتاری پێشووی سنە بە میدیاکانی راگەیاند، بڕیاردراوە چالاکڤانێکی بەلوچی سوننەش بە پێکهاتەی ئەنجوومەنی بەڕێوەبردنی قۆناخی راگوەزەر زیاد بکرێت.