18-06-2021
00:40
هەڵبژاردنی سەرۆکایەتیی کۆماری ئێران کۆتاییهات
بەشداریکردن لە هەڵبژاردنی سەرۆکایەتیی کۆماری ئێران. وێنە: AFP
رووداو دیجیتاڵ
دوای ئەوەی کە پێنج جار کاتی هەڵبژاردن درێژکرایەوە، کۆمیسیۆنی هەڵبژاردنەکانی ئێران رایگەیاند، کاژێر 02:00ـی بەرەبەیان بە کاتی تاران کۆتایی بە پرۆسەی دەنگدان هێنرا و تەنیا ئەو کەسانەی کە لە بنکەکاندا ماون دەتوانن دەنگ بدەن.
دوای داخستنی بنکەکان، کۆمیسیۆنی هەڵبژاردن دەستیان بە جیاکردنەوەی دەنگەکان کردووە. تاوەکو ئێستا هیچ زانیارییەکی فەرمیی لەبارەی دوایین ئاماری رێژەی بەشداریکردن بڵاونەکراوەتەوە. پێشتر وەزارەتی ناوخۆی ئێران رایگەیاندبوو، پێشنیوەڕۆی ئەمڕۆ ئەنجامی هەڵبژاردنەکان رادەگەیێنرێت.
زیاتر بخوێنەوە
23:33
دەنگدان لە ئێران تاوەکو کاژێر 02:00ـی بەرەبەیان درێژدەکرێتەوە
ژن و پیاوێک لە کاتی دەنگدان لە هەڵبژاردنی سەرۆکایەتیی کۆماری ئێران
کۆمیسیۆنی هەڵبژاردنی ئێران رایگەیاند، هەموو بنکەکانی دەنگدان کە سەردانیکەرینا هەیە، دەتوانن تاوەکو کاژێر 02:00ـی بەرەبەیان بەردەوامی بە چالاکییەکانیان بدەن.
بەپێی زانیارییەکانی ئاژانسی هەواڵیی فارس، ناوەندی بانگەشەی هەڵبژاردنی رەئیسی، هیمەتی، قازی زادە و رەزایی داوای درێژکردنەوەی کاتی دەنگدانیان کردووە بۆ کاژێر 02:00ـی بەرەبەیان.
19:55
ئاژانسی فارس: تاوەکو کاژێر 7:30 خولەک 22 ملیۆن کەس دەنگیان داوە
ئاژانسی فارس: تاوەکو کاژێر 7:30 خولەک 22 ملیۆن کەس دەنگیان داوە
ئاژانسی فارسی ئێران کە سەر بە لایەنی نەریتخوازانە، لە دوایین هەواڵیدا تایبەت بە ئامارەکانی دەنگدان دەڵێت، تاوەکو کاژێر 7:30 خولەکی ئێوارە بە کاتی تاران، 22 ملیۆن کەس کە دەبێتە 37٪ـی ژمارەی دەنگدەرانی ئێران، دەنگیان داوە.
بەپێی زانیارییەکانی ئاژانسەکە، دوای کەمبوونەوەی گەرما و فێنکیی کەشوهەوا، مەزندە دەکرێت رێژەی بەشداربوون بگاتە 50٪.
لەلایەکی دیکەوە وەزارەتی ناوخۆی ئێران دوابەدوای هەواڵەکەی ئاژانسی فارس رایگەیاند؛ "ئامارە نافەرمییەکان قبووڵکراو نین و نابێ میدیاکان هیچ ئامارێکی نافەرمی بڵاوبکەنەوە."
بەرپرسی کۆمیسیۆنی هەڵبژاردنی هەندێک لە پارێزگاکانیش باس لە رێژەی کەمی بەشداریکردنی خەڵک دەکەن. حوسێن خۆش ئێقباڵ، بەرپرسی کۆمیسیۆنی هەڵبژاردنی پارێزگای کرماشان رایگەیاند، تاوەکو کاژێر 08:00ـی ئێوارە بە کاتی ئێران، رێژەی بەشداریکردن لەو پارێزگایە 35% بووە کە لە گوندەکاندا ئەو رێژەیە تاوەکو 32% بووە.
بەرپرسی کۆمیسیۆنی هەڵبژاردنی پارێزگای ئیسفەهانیش باس لەوە دەکات، رێژەی هەڵبژاردن لەو پارێزگایە تاوەکو کاژێر 07:00ـی ئێوارە 25٪ بووە.
پێشتر عەباسعەلی کەدخودایی، گوتەبێژی ئەنجوومەنی پاراستنی دەستوور ئاماژەی بەوە کردبوو، خەڵک دەتوانن تاوەکو کاژێر 12:00 دەنگ بدەن، بەڵام کۆمیسیۆنی هەڵبژاردنەکانی ئێران لە نوێترین راگەیێندراویدا دەڵێت، تاوەکو کاژێر 10:00 بەکاتی ناوخۆیی تاران خەڵک دەتوانن دەنگ بدەن.
57 ملیۆن کەس لە ئێران و رۆژهەڵاتی کوردستان دەتوانن دەنگ بدەن.
زیاتر بخوێنەوە
19:13
هەڵبژاردنی ئێران تاوەکو کاژێر 12ـی شەو درێژکرایەوە
عەباسعەلی کەدخودایی، گوتەبێژی ئەنجوومەنی پاراستنی دەستوور
عەباسعەلی کەدخودایی، گوتەبێژی ئەنجوومەنی پاراستنی دەستووری ئێران بە ئاژانسی فەرمیی وڵاتەکەی راگەیاند، رێژەی بەشداریکردن باشە و، هەڵبژاردنی سەرۆکایەتیی ئێران تاوەکو کاژێر 00:00 درێژدەکرێتەوە.
کەدخودایی لەبارەی سەرپێچییەکان لە دەنگدان ئاماژە بەوە دەکات، سەرپێچییەکان لە بەرەبەیانی ئەمڕۆ بوون، ئێستاش لەبارەی بەردەوامبوونی بانگەشە و کەمیی لاپەڕەی دەنگدان چەند سکاڵایەک تۆمارکراون و بەدواداچوونیان بۆ دەکرێت.
زیاتر بخوێنەوە
ماڵپەڕی ئەنجوومەنی پاراستنی دەستووری ئێران رایگەیاندووە کە تاوەکو کاژێر 19:00 بە کاتی تاران پێنج هەزار 752 سکاڵا لەبارەی هەڵبژاردنەکان تۆمارکراون.
18:57
پاسێکی تایبەت بە دەنگدان وەرگەڕا و 7 کەس بوونە قوربانی
ئەو پاسەی لە دیواندەرە وەرگەڕا. وێنە و ڤیدیۆکان لە تۆڕە کۆمەڵایەتییەکان وەرگیراون
قایمقامی شاری دیواندەرە لە پارێزگای سنە دەڵێ: پاسێکی سندووقێکی گەڕۆکی دەنگدان لە ناوچەی کەرەفتوو وەرگەڕاوە و 6 کەس بریندار بوون و کەسێکیش گیانی لەدەستداوە.
بەگوتەی جەمال ئەرشەدی، قایمقامی دیواندەرە، ئەو پاسە سەرلەبەیانیی ئەمڕۆ هەینی، بۆ کۆکردنەوەی دەنگی خەڵکی گوندەکانی ناوچەی کەرەفتووی دیواندەرە رەوانەی ئەو ناوچەیە کراوە، بەڵام بەهۆی کەمتەرخەمیی شۆفێرەکەیەوە وەرگەڕاوە.
ئەرشەدی دەڵێ؛ ئەو کەسەی کە گیانی لەدەستداوە، سەربازێک بووە کە بەرپرسیارێتیی ئەمنیی سندووقەکەتی لە ئەستۆ بووە و 6 کەسەکەی دیکەش لە بەڕێوەبەرانی هەڵبژاردن بوون، کە شەش کەسیان لەبەر قوڵیی بەرینەکانیان بۆ نەخۆشخانەی دیواندەرە راگوێزراون.
قایمقامی دیواندەرە گوتوویەتی: دوای ئەم رووداوە تیمێکی دیکە بۆ کۆکردنەوەی دەنگی خەڵکی گوندەکانی ناوچەی کەرەفتوو بەڕێکراوە.
17:46
رووحانی بۆ بەرپرسانی ئێران: تکایە یەک دەنگیش جێگۆڕکێی پێنەکرێت
حەسەن رووحانی لە کاتی بەشداریکردن لە هەڵبژاردنی سەرۆکایەتیی کۆماری ئێران
سەرۆککۆماری ئێران داوا لە بەرپرسانی حکومەت دەکات دەنگی دەنگدەران بپارێزن و جێگۆڕکێیان پێنەکرێت.
لە دوای بەشداریکردنی لە پرۆسەی دەنگدان لە هەڵبژاردنەکانی سەرۆکایەتیی ئێران، حەسەن رووحانی رایگەیاند، داوا لە بەرپرسانی حکومەت دەکەم دەنگی دەنگدەران بپارێزن و هیچ دەنگێک جێگۆڕکێی پێنەکرێت.
راشیگەیاند، دەنگی خەڵک دەبێت پارێزراو بێت تاوەکو ئەنجامی هەڵبژاردنەکان بەو جۆرە بێت کە خوازیاری خەڵک بێت و ئەنجامەکان بەگوێرەی دەنگی دەنگدەران بێت.
رووحانی گوتیشی، "دەزانم کە خەڵک کێشە و گرفتی هەیە، بەڵام پێویستە ئەوانە پشتگوێ بخرێن و بەشداری لە هەڵبژاردنەکاندا بکەن."
17:19
وتارخوێنی پاوە: سەرچاوەی متمانەپێکراومان هەیە کە لە هەڵبژاردنەکان سەرپێچیکراوە
مامۆستا قادر قادری، پێشنوێژ و وتارخوێنی پاوە
مامۆستا قادر قادری، پێشنوێژ و وتارخوێنی پاوە دەڵێت: "بە بەڕێوەبەرانی بنکەکانی دەنگدان گوتراوە کە با فڵانە بەربژێر دەنگ نەهێنێتو ئەوەش جێی تێڕامانە."
مامۆستا مەلا قادر قادری، لە وتاری ئەمڕۆی نوێژی هەینیی پاوەدا گوتی: "زانیاریی جێی متمانەمان بە دەست گەیشتووە کە بەڕێوەبەرانی هەڵبژاردن ساختەکارییان لە هەڵبژاردندا کردووە."
مەلا قادر قادری پێشتر پشتیوانیی خۆی بۆ ئیبراهیم رەئیسی، بەربژێری نەریتخواز، دەربڕیبوو. جگە لەو بەشێکی دیکە لە مامۆستا ئایینییە سوننە مەزهەبەکانی دیکەش ئەمجارە پشتیوانییان لە رەئیسی کردووە، لەوانە مەولەوی عەبدولحەمید، لە رێبەرانی سوننە مەزهەبی بەلوچستان.
مەلا قادر قادری رەزامەندیی لە رێژەی بەشداریی خەڵک لە شارەکانی پاوە، جوانڕۆ و روانسەر دەربڕیوە.
زیاتر بخوێنەوە
17:05
زیاتر لە 130 هەزار ئەندامی سوپای پاسداران ئاسایشی بنکەکانی دەنگدان دەپارێزن
حوسێن سەلامی، فەرماندەی سوپای پاسداران
حوسێن سەلامی، فەرماندەی سوپای پاسداران دەڵێ: زیاتر لە 130 هەزار بەسیجی و فەرماندەکانی سوپای پاسداران بۆ پاراستنی ئەمن و ئاسایشی هەڵبژاردن یارمەتی پۆلیس دەکەن.
بەگوتەی حوسێن سەلامی، فەرماندەکانی هەموو لقەکانی سوپای پاسداران لە پارێزگاکانیش بۆ بەڕێوەچوونی هەڵبژاردنێکی ئەمن یارمەتی پۆلیس دەکەن.
پێشتریش حوسێن ئەشتەری، فەرماندەی پۆلیس ئێران، گوتبووی، فەرماندەی سوپای پاسداران لە ناوەندیی فەرماندەیی پۆلیس جێگیر بووە و جگەلە ئامادەبوونی هێزەکانی بەسیج و سوپای پاسداران لەسەر سندووقەکانی دەنگدان، لە دەرەوەی ناوەندەکانی دەنگدانیش "هێزە ئیتلاعاتییەکان چالاکن".
حوسێن ئەشتەری دەڵێ: تاوەکوو ئێستا هیچ حاڵەتێکی ئەمنیی لە هەڵبژاردندا رووینەداوە.
16:48
کەڕووبی دەنگی بە 'هیمەتی داوە'
مەهدی کەڕووبی، رێبەری دەستبەسەرکراوی ریفۆمخوازانی ئێران
مەهدی کەڕووبی، لە رێبەرانی دەستبەسەرکراوی ریفۆمخوازانی ئێران، لە هەڵبژاردنی سەرۆککۆماریی ئەمڕۆی ئێراندا دەنگیدا. ئەو لە سندووقێکی گەڕۆکدا دەنگی داوە.
بەگوتەی غوڵامحوسێن کەرباسچی، سکرتێری حزبی کارگوزارانی سازندەگی ئێران، مەهدی کەڕووبی دەنگی بە عەبدولناسر هیممەتی داوە.
مەهدی کەڕووبی پێشتر داوای لە خەڵک کردبوو لە هەڵبژاردندا بەشداریی بکەن. ئەو هۆشداری دابوو "رەوتێکی بچووک کە پێگەی جەماوەرییان نییە" دەیانەوێت لایەنی کۆماریبوونی کۆماری ئیسلامی "لەنێو"بەرن.
مەهدی کەڕووبی لە بەربژێرەکانی هەڵبژاردنی سەرۆککۆماری ساڵی 2009ی ئێران بوو. ئەو لەگەڵ میرحوسێن موسەوی هەڵبژاردنیان بە مەحموود ئەحمەدی نەژاد دۆڕاند.
بەڵام ئەوان پێیانوابوو لە هەڵبژاردندا بە قازانجی ئەحمەدی نەژاد ساختەکاری کراوە، بۆیە لایەنگرەکانیان هێنایە سەرشەقام. بەهۆی ئەم رووداوانە ئەوان لەو کاتەوە لە ماڵەوە دەستبەسەرن.
میرحوسێن موسەوی بەپێچەوانەی کەڕووبی داوای لە خەڵک نەکرد لە هەڵبژاردنی ئەمجارەدا بەشداریی بکەن.
16:45
میدیای ئێران: زیاتر لە 14 ملیۆن کەس دەنگیانداوە
بەشداریکردنی خەڵکی ئێران لە هەڵبژاردنی سەرۆکایەتیی کۆماری وڵاتەکە. وێنە :AFP
ئاژانسی فارس نزیک لە سوپای پاسداران بڵاوی کردووەتەوە، تاوەکو کاژێر 16:45 خولەک بە کاتی تاران زیاتر لە 14 ملیۆن کەس، واتە 23٪ ئەو کەسانەی مەرجەکانی دەنگدانیان هەیە، دەنگیانداوە.
عەباسعەلی کەدخودایی، گوتەبێژی ئەنجوومەنی پاراستنی دەستووری ئێران، دەڵێ: ئەو ئامارانەی کە لە ئینتەرنێتدا دەخرێنەڕوو گریمانەن و ئەنجامی هەڵبژاردنەکان دوای کۆکردنەوەی دەنگەکان لەلایەن ئەنجوومەنی پاراستنی دەستوورەوە رادەگەیێنرێت.
هاوکات دوای دەربڕینی ناڕەزایەتیی ناوەندی هەڵبژاردنی ئیبراهیم رەئیسی بە روودانی کێشە لە رەوتی هەڵبژاردن، ئەحمەد جەنەتی، سکرتێری ئەنجوومەنی پاراستنی دەستوور، لە نامەیەکی فەرمیدا بۆ وەزیری ناوخۆی ئێران داوای کردووە ئەم کێشانە چارسەر بکرێت.
ئەحمەد جەنەتی کە هاوکات سەرۆکی ناوەندی چاودێریی هەڵبژاردنەکانە دەڵێ: لە پارێزگاکانەوە راپۆرتی جۆراوجۆرمان
بەدەست گەیشتووە، کە سندووقە ئەلکترۆنییەکان لە شار و گوندەکان رەوتی بەڕێوەچوونی هەڵبژاردنیان زۆر هێواش کردووەتەوە، قەرەباڵخیی زۆریان دروست کردووە و لە رەوتی هەڵبژاردندا کێشەیان دروست کردووە.
ماڵپەڕی ئەنجوومەنی پاراستنی دەستووری ئێران بڵاوی کردووەتەوە، تاوەکو کاژێر 16 بەکاتی تاران راپۆرتی نزیک بە 5 هەزار سەرپێچی بە دەستیان گەیشتووە.
بەپێی زانیاریی سەرچاوە خۆجێییەکان، موحسین قازی زادە هاشمی، بەربژێری هەڵبژاردنی سەرۆککۆماریی ئێران، بەهۆی ئەم کێشانەوە نزیک بە 3 کاژێر چاوەڕێیە تاوەکو توانیویەتی دەنگ بدات.
12:07
27 کەس بەهۆی ئاستەنگ دروستکردن بۆ پرۆسەی دەنگدان لە گیلان دەستگیرکران
حوسێن حەسەن پوور، جێگری فەرماندەی پۆلیسی پارێزگای گیلان
جێگری فەرماندەی پۆلیسی گیلان رایگەیاند، هەرکەس گرفت بۆ پرۆسەی دەنگدان دروستبکات بەرەوڕووی دەبنەوە و 27 کەس بەهۆی ئاستەنگ دروستکردن بۆ هەڵبژاردن دەستگیرکراون.
حوسێن حەسەن پوور، جێگری فەرماندەی پۆلیسی پارێزگای گیلان لە باکووری ئێران رایگەیاند، بە تووندی بەرەوڕووی هەر هەڕەشە و هەنگاوێکی نایاسایی بۆ گرفت دروستکردن و تێکدانی ئاسایشی هەڵبژاردن دەبینەوە و ئەوە سەرەکیترین کاری هێزەکانی پۆلیسە و ئامادەیی تەواومان هەیە بۆ بەڕێوەبردنی هەڵبژاردن.
ئەو بەرپرسەی پۆلیسی گیلان دەڵێت، تاوەکو ئێستا بۆ دابینکردنی ئاسایشی هەڵبژاردن، 7 کاروانی بانگەشەی هەڵبژاردن و 47 سەرپێچی هەڵبژاردن کە پیش وادەی بانگەشە پۆستەریان بڵاوکردبووەوە لەلایەن پۆلیسەوە تووشی لێپێچینەوە بوون و 27 کەسیش دەستگیرکراون.
زیاتر بخوێنەوە
10:46
کەمپەینی هەڵبژاردنی رەئیسی لە پرۆسەی بەڕێوەچوونی دەنگدان ناڕازییە
ئیبراهیم رەئیسی لەکاتی دەنگدان
کەمپەینی هەڵبژاردنی ئیبراهیم رەئیسی، بەربژێری سەرۆکایەتیی کۆماری ئێران بە فەرمیی ناڕەزایەتیی خۆیان دەدەنە ناوەندی هەڵبژاردنی ئێران لەبارەی پرۆسەی دەنگدان و دەڵێن لە هەندێ لە بنکەکانی دەنگدان کێشە دروستبووە.
لەنامەیەکدا بۆ سەرۆکی کۆمیسیۆنی بانگەشەی هەڵبژاردنی سەرۆکایەتیی کۆماری ئێران، کەمپەینی هەڵبژاردنی رەئیسی رایدەگەیێنێت: "ئەگەرچی لەکاژێر 7:00ـی بەیانییەوە دەنگدان دەستیپێکردووە بەڵام بەپێی ئەو راپۆرتانەی لە ناوچە جیاوازەکانی ئێرانەوە بە ئێمە گەیشتووە، دەریدەخات ئاستەنگی جیددی لە پرۆسەکەدا هەیە کە بەشێک لە ناڕەزایەتییەکان نێردراوە بۆ وەزارەتی ناوخۆ".
هەروەها داواکراوە هەنگاوی بەپەلە بنرێت بۆ هۆشداریی پێدان بە پێشکەشکارەکانی بووڵتەنە هەواڵییەکانی رادیۆ و تەلەڤزیۆنی ئێران و ناوەندی پاریزگاکان و هەروەها وەزارەتی ناوخۆ.
لە نامەکەدا کەمپەینی هەڵبژاردنی ئیبراهیم رەئیسی روونی نەکردووەتەوە کە لە چی ناڕازین و کێشەکان چین. بەتایبەت ناڕەزایەتییەکان لە رادیۆ و تەلەڤزیۆنی ئێران کە رکابەرەکانی بەردەوام رادیۆ و تەلەڤزیۆنی ئێران بە بانگەشە بۆ رەئیسی تۆمەتبار دەکەن.
زیاتر بخوێنەوە
10:35
خاتەمی دەنگی خۆی خستە نێو سندووقەکانی دەنگدان
ساتی دەنگدانی خاتەمی
سەید محەممەد خاتەمی کە بە رێبەری ریفۆرمخوازەکانی ئێران دادەنرێت و بۆ ماوەی دوو خول سەرۆککۆماری ئێران بووە، بەشداریی لە هەڵبژاردن کرد و دەنگی خۆی خستە نێو سندووقی دەنگدان.
خاتەمی لەبارەی ئەنجامی هەڵبژاردنی سەرۆکایەتیی کۆماری ئێران گوتی: "من پێشبینی ناکەم". هەورەها لەوەڵامی ئەوەی ج پەیامێکی بۆ خەڵکی ئێران هەیە گوتی: "سوپاسی خەڵکی ئێران دەکەم".
زیاتر بخوێنەوە
09:47
نازم دەباغ: هەڵبژاردنی ئێران کاریگەریی نەرێنیی لەسەر پەیوەندیی هەولێر و تاران نابێت
نازم دەباغ، نوێنەری حکومەتی هەرێمی کوردستان لە تاران
لە شوباتی ئەمساڵ شاندێکی باڵای پارتی دیموکراتی کوردستان لە بەغدا لەگەڵ ئیبراهیم رەئیسی، بەهێزترین بەربژێری خولی 13یەمی هەڵبژاردنی سەرۆککۆماری ئێران کۆبوونەوە. ئەوکات میدیاکانی ئێران بڵاویانکردەوە، کە رەئیسی لەو کۆبوونەوەیەدا داوایکردووە لایەنە سیاسییەکانی کوردستان یەکڕیز و یەکگرتووبن و لە ئەمریکاش دووربکەونەوە.
ئیبراهیم رەئیسی داوای لە شاندەکەی پارتیش کردبوو، ئەوانەی لە ئێران بڕیاری دەستبەسەرکردنیان دەدرێت، هەرێمی کوردستان داڵدەیان نەدات و رادەستی ئێرانیان بکاتەوە.
پەیوەندیی نێوان هەولێر و تاران لەسەر ئاستی حیزبی و حکومییە. ئیرەج مەسجیدی، باڵیۆزی ئێران لە عێراق پەیوەندییەکە بە قووڵ و لەمێژینە ناودەبات و دەڵێت "عێراق بایی 13 ملیار دۆلار ئاڵوگۆڕی بازرگانییان هەیە، زۆربەی ئەو ئاڵوگۆڕەش لەڕێگەی هەرێمی کوردستانەوەیە".
نازم دەباغ، نوێنەری حکومەتی هەرێمی کوردستان لە تاران دەڵێت، هەڵبژاردنی سەرۆککۆماری ئێران کاریگەریی نەرێنیی لەسەر سیاسەتی ناوچەکە نابێت، بەتایبەتی لەگەڵ حکومەتی هەرێمی کوردستاندا.
نوێنەری حکومەتی هەرێمی کوردستان لە ئێران ئاماژە بەوە دەکات "لەبەرئەوەی جوگرافیای سیاسی و ئەمنی و ئابووریی هەرێمی کوردستان لەگەڵ کۆماری ئیسلامیی ئێراندا جوگرافیایەکی نەگۆڕە، پێویستی بە هاوکاریی زیاترە. بۆیە ئەگەر پەیوەندییەکانی [هەولێر و تاران] پتەوتر نەبن، هیچ گۆڕانکارییەک بەرەو دواوە بەسەر پەیوەندییەکاندا نایەت".
هەرێمی کوردستان، سنوورێکی دوورودرێژی لەگەڵ ئێراندا هەیە، کە لە داڵانپەڕەوە دەستپێدەکات تاوەکو خوارووی ئێران، هەروەها خاوەنی سێ دەروازەی نێودەڵەتییە لەگەڵ ئێران، ئەوانیش حاجی ئۆمەران، پەروێزخان و باشماخن، لەگەڵ ژمارەیەک خاڵی سنووری.
باڵیۆزی ئێران لە عێراق لە چاوپێکەوتنێکدا لەگەڵ کەناڵی فەرمیی وڵاتەکەی، رایگەیاندووە "هەرێمی کوردستان بە وڵاتی دووەمی خۆیان دەزانن".
ئێران ماوەی چەندین ساڵە لە هەولێر و سلێمانی دوو کۆنسوڵخانەی کردووەتەوە، کۆنسوڵی هەولێر سیاسەتی وڵاتەکەی بە نەگۆڕ و کۆنسوڵەکەی سلێمانیش پەیوەندییەکانی تاران لەگەڵ هەولێر بە هەمەلایەن ناودەبات.
نەسروڵلا رەشنوودی، سەرکۆنسوڵی ئێران لە هەولێر باس لەوە دەکات "سیاسەتی دەرەوەی کۆماری ئیسلامیی ئێران سیاسەتێکی روون و ئاشکرایە، بەپێی ئەو رێوشوێنە پێویستانەی بیری لێکراوەتەوە و بڕیارەکانی نیزامی دەیدات، سیاسەتی دەرەوەش هەر بەپێی ئەوە دەڕوات".
مەهدى شووشتەرى، سەرکۆنسوڵی ئێران لە سلێمانى دەڵێت "پەیوەندییەکى زۆر زۆر باشمان لەگەڵ هەرێمى کوردستان هەیە لە بوارە جیاوازەکانى کولتووری، سیاسى، ئابووری و بازرگانی. حەوت خاڵ و دەروازەى هاوبەشمان لەگەڵ هەرێمی کوردستان هەیە. پەیوەندی و ئاڵوگۆڕی زۆر باشمان لەگەڵ عێراق و هەرێمی کوردستان هەیە. بۆیە بە دڵنیاییەوە هەرکام لە بەربژێرەکانی سەرۆکایەتیی کۆمار سەربکەون، ئەم سیاسەتە کە سیاسەتی پەرەپێدانی پەیوەندییەکانە لەگەڵ وڵاتانی دراوسێ، بە بەهێزییەوە بەردەوام دەبێت".
لە ساڵانی رابردوودا چەندجارێک محەممەد جەواد زەریف وەکو وەزیری دەرەوەی ئێران چووەتە هەرێمی کوردستان و جەختی لە پەرەدان بە پەیوەندییەکانی نێوان هەردوولا کردووەتەوە؛ دوایین سەردانیشی لە کۆتایی نیسانی ئەمساڵدا بوو.
08:44
رووحانی دەنگیدا
ساتی دەنگدانی رووحانی
سەرۆککۆماری ئێران، لە وەزارەتی ناوخۆ دەنگی خۆی خستە نێو سندووقەکانی دەنگدان.
حەسەن رووحانی، سەرۆککۆماری ئێران ئەمڕۆ سەردانی وەزارەتی ناوخۆی کرد و لە نزیکەوە ئاگاداریی کاروبارەکانی ناوەندی هەڵبژاردن بوو و دواتر دەنگی خۆی خستە نێو سندووقەکانی دەنگدان.
زیاتر بخوێنەوە
06:45
ئیبراهیم رەئیسی دەنگی خۆی خستە نێو سندووقەکانی دەنگدان
ئیبراهیم رەئیسی لەکاتی دەنگدان
ئیبراهیم رەئیسی یەکێک لە بەربژێرەکانی هەڵبژاردنی سەرۆکایەتیی ئێران، سەرلەبەیانی ئەمڕۆ هەینی 18-6-2021 دەنگی خۆی خستە نێو سندووقەکانی دەنگدان.
لە کاژێر 07:00ـی سەرلەبەیانی ئەمڕۆ بەکاتی تاران کە دەکاتە 05:30 خولەک بەکاتی هەولێر، سێزدەیەمین هەڵبژاردنی سەرۆکایەتیی ئێران، هەڵبژاردنی ئەنجوومەنی شارەوانیی شار و گوندەکان و هەروەها دەنگدان بۆ پەرلەمانی ئێران و ئەنجوومەنی شارەزایانی رێبەریی لەو پارێزگا و شارانە کە یەکلایی نەبوونەتەوە دەستیپێکرد.
زیاتر بخوێنەوە
06:31
هەڵبژاردنی سەرۆکایەتی؛ کێبڕکێ لەنێوان دەنگدان و دەنگنەدان
سندووقەکانی دەنگدان
ئەمڕۆ لە ئێران یەکێک لە جیاوازترین هەڵبژاردنەکانی سەرۆکایەتیی لە 40 ساڵی رابردوو دەکرێت. دەنگدان و دەنگنەدان، ئێرانییەکانی دابەشکردووە. رێبەری ئێران داوای بەشداریی لە دەنگدان دەکات و خەڵکانێکی زۆریش لە تۆڕە کۆمەڵایەتییەکان و لەسەر شەقامەکانی ئێرانیش بە کەمپەینی دەنگ نادەین، دەیانەوێت تووڕەیی و ناڕەزایەتییەکانی خۆیان لە دۆخی وڵاتەکەیان بەوشێوەیە دەربڕن.
رەتکردنەوەی بەربڵاوی شیاویەتیی بەربژێرەکانی سەرۆکایەتی و دۆخی ئابووریی و سیاسیی ئێران، وایکردووە هەڵبژاردنی ئەمجارە بە دۆخێکی جیاواز لە ساڵانی رابردوو تێپەڕێت. لەماوەی بانگەشەی هەڵبژاردن بە ئاشکرا دەبیندرا کە خەڵکی ئەو وڵاتە پێشوازیی لە هەڵبژاردنەکە ناکەن و شەقامەکانی ئەو وڵاتە هیچ گەرموگوڕییەکی وەک هەڵبژاردنەکانی پیشوو پێوەدیار نییە. هەر ئەوەشبوو کە وایکرد رێبەری باڵای ئێران پێچەوانەی خولەکانی رابردوو چەندجارێک بەشێوەی راستەوخۆ قسە لەگەڵ خەڵکی ئێران بکات و هانیان بدات بۆ بەشداریی لە هەڵبژاردن.
عەلی خامنەیی رێبەری ئێران، لە رووداوێکی کەموێنە 48 کاژێر پێش رۆژی دەنگدان جارێکی دیکە لە رادیۆ و تەلەڤزیۆنی ئێرانەوە قسەی لەگەڵ خەڵک کرد و داوایکرد بچنە سەر سندووقەکانی دەنگدان. رێبەری ئێران گوتی، دەنگنەدان دەبێتە هۆی لاوازیی دەسەڵاتی ئێران و دوورکەوتنەوەی خەڵک لە رژێم. هەروەها گوتی کێشەکانیش بە دەنگنەدان چارەسەر ناکرێن.
بەڵام ئۆپۆزیسیۆن و زۆربەی خەڵکی ئێران پێیانوایە دەنگدانیان هیچ شتێک لە ئێران ناگۆڕێت. ئەوان لەو باوەڕەدان کە ئەنجامەکە یەکلایی بووەتەوە و ئیبراهیم رەئیسی، سەرۆککۆماری داهاتووی ئێرانە و هەڵبژاردنێکی بێ رکابەری بۆ رێکخراوە. بە گوێرەی نوێترین راپرسیی ئاژانسی راپرسیی خوێندکارانی ئێران ناسراو بە ئیسپا، ئەو بەربژێرە تەمەن 60 ساڵە، سەرووی ٪60ی دەنگەکانی ئەو کەسانە بەدەستدەهێنێت کە بەشداریی هەڵبژاردن دەکەن.
ئەگەرچی دوای رەتکردنەوەی شیاویەتی زۆربەی بەربژێرەکان، تەنیا 7 کەس مابوونەوە، بەڵام لەو حەوت کەسەش لەماوەی هەفتەی رابردوو عەلیرەزا زاکانی و سەعید جەلیلی لە بەرژەوەندیی رەئیسیی کشانەوەی خۆیان لە هەڵبژاردنەکە راگەیاند و موحسین مێهرعەلیزادەش کە بە بەربژێرێکی ریفۆرمخواز دادەنرا (هەرچەند پشتیوانیی ریفۆرمخوازەکانی نەبوو) بەبێ ئەوەی پشتیوانیی لە هیچ بەربژێرێک رابگەیێنێت، کشانەوەی خۆی راگەیاند.
ئیستا بەربژێرەکانی ئەمانەن:
1- ئیبراهیم رەئیسی
2- موحسین رەزایی
3- عەبدولناسر هیممەتی
4- ئەمیر حوسێن قازی زادەی هاشمی
رێژەی بەشداریی لە هەڵبژاردنەکەش ناکۆکیی لەنێوان ئۆپۆزیسیۆن و دەسەڵات دروستکردووە. بەپێی زۆربەی راپرسییەکانی ئۆپۆزیسیۆن و پێشبینییەکانیان رێژەی دەنگدان لەژێر 30% دەبێت. بە گوێرەی راپرسییەکەی ئیسپاش، تەنیا 42٪ی ئەو 59 ملیۆن کەسەی کە مافی دەنگدانیان هەیە، بەشداریی لە دەنگداندا دەکەن کە ئەگەر ئەوەش راست بێت، کەمترین رێژەی بەشداریی خەڵکی ئێرانە لە هەڵبژاردنی سەرۆکایەتیی ئەو وڵاتە.
دوای کشانەوەی سێ بەربژێر، ئێستا تەنیا بەربژێرێکی ریفۆرمخواز و دوو بەربژێری دیکەی نەریتخواز لەگەڵ رەئیسی لە کێبڕکێکەدا ماونەتەوە کە بەگوێرەی راپرسییەکان و پیشبینییەکان چانسی بردنەوەیان لە بەرامبەر رەئیسی زۆر لاوازە.
06:30
رێبەری ئێران دەنگی خۆی خستە نێو سندووقەکانی دەنگدان
ساتی دەنگدانی رێبەری ئێران
لە خولەکەکانی یەکەمی دەستپێکردنی پرۆسەی دەنگدان بۆ هەڵبژاردنەکانی ئێران، رێبەری ئێران دەنگی خۆی خستە نێو سندووقەکانی دەنگدان.
عەلی خامنەیی، رێبەری باڵای کۆماری ئیسلامی ئێران لە حوسەینییەی "ئیمام خومەینی" دەنگی خۆی خستە نێو چوار سندووقی دەنگدان بۆ سێزدەیەمین هەڵبژاردنی سەرۆکایەتی، شەشەمین خولی هەڵبژاردنی ئەنجوومەنی شارەوانیی شار و گوندەکان، نێوان خولیی پێنجەمین خولیی ئەنجوومەنی شارەزایانی رێبەری و نێوان خولیی یازدەیەمین خولی پەرلەمانی ئێران.
رێبەری ئێران لەدوای دەنگدان گوتارێکی پێشکەشکرد و تێیدا داوای لە خەڵکی وڵاتەکەی کرد بەشداریی لە هەڵبژاردنەکاندا بکەن .رێبەری ئێران رایگەیاند، تاوەکو بەشداری خەڵک لە هەڵبژاردنەکاندا زیاتر بێت ئەوا پێگەی ئێران لە گۆڕەپانی نێودەوڵەتی بەهێزتر دەبێت. گوتیشی دەنگدان ئەرکێکی نەتەوەیی سەر شانی هەمووانە و پێویستە هەموو تاکێکی ئێران ئەو ئەرکەی سەرشانی جێبەجێبکات.
زیاتر بخوێنەوەعەلی خامنەیی، رێبەری ئێران وەک یەکەم کەس دەنگی خۆی خستە نێو سندووقەکانی دەنگدان pic.twitter.com/9SiNc7lgz7
— Rudaw (@Rudawkurdish) June 18, 2021
06:05
نوێترین زانیارییەکان لەبارەی پرۆسەی دەنگدان بۆ هەڵبژاردنەکانی ئێران
59 ملیۆن و 310 هەزار و 307 کەس مافی دەنگدانیان هەیە
رووداو دیجیتاڵ
لە کاژێر 07:00ـی سەرلەبەیانی ئەمڕۆ بەکاتی تاران کە دەکاتە 05:30 خولەک بەکاتی هەولێر، سێزدەیەمین هەڵبژاردنی سەرۆکایەتیی ئێران، هەڵبژاردنی ئەنجوومەنی شارەوانیی شار و گوندەکان و هەروەها دەنگدان بۆ پەرلەمانی ئێران و ئەنجوومەنی شارەزایانی رێبەریی لەو پارێزگا و شارانە کە یەکلایی نەبوونەتەوە دەستیپێکرد.
لەکۆی 59 ملیۆن و 310 هەزار و 307 کەس کە مافی دەنگدانیان هەیە، 29 ملیۆن و 980 هەزار و 38 کەس پیاون و 29 ملیۆن و 330 هەزار و 269 کەسیش ژنن. تەمەنی یاسایی بۆ بەشداریی لە دەنگدان 18 ساڵە و ژمارەی ئەو کەسانەش کە بۆ یەکەمجار دەتوانن لە هەڵبژاردن دەنگ بدەن یەک ملیۆن و 392 هەزار و 148 کەسن.
زیاتر لە 66 هەزار سندووقی دەنگدان بۆ هەڵبژاردنی سەرۆککۆمار و زیاتر لە 76 هەزار سندووقی دەنگدانیش بۆ هەڵبژاردنی ئەنجوومەنی شارەوانیی شار و گوندەکان دابین کراون. هەروەها بەگوتەی سەعید خەتیب زادە، گوتەبێژی وەزارەتی دەرەوەی ئێران هەڵبژاردنی 234 سندووقی دەنگدان بۆ هەڵبژاردنی سەرۆکایەتیی لە 133 وڵاتی جیهان بۆ ئێرانیانی نیشتەجێی ئەو وڵاتانە دانراون.
بەهۆی رێکارەکانی خۆپارێزیی لە کۆرۆنا هەڵبژاردنەکان لە کاژێر 07:00 دەستیپێکردووە و بە بڕیاری وەزیری ناوخۆ دەتوانرێت تاوەکو کاژێر 02:00ـی بەرەبەیان بەکاتی تاران درێژ بکرێتەوە.
زیاتر بخوێنەوە