سوپای پاسداران: ئەندامێکی خۆجێییمان لە شەڕی ناوچەی مەریواندا کوژراوە

 

پەیوەندییەکانی لقی پارێزگای سنەی سوپای پاسداران رۆژی شەممە، 17-6-2023، بڵاویکردەوە، لە شەڕی شەوی رابردووی "نێوان سوپای پاسداران لە ناوچەی مەریوان و ئەندامانی گرووپە دژە شۆڕشەکان، ئەندامێکی خۆجێیی سوپای پاسداران بە ناوی رزگار تەبیرە" کوژرا.

 

بەپێی راگەیێندراوی پەیوەندییەکانی لقی پارێزگای سنەی سوپای پاسداران، شەڕ لە نزیک گوندەکانی دەرەتفێ، سەردۆش و هەروەها لە بەشی رۆژئاوای دەریاچەی زرێباردا روویداوە.

 

چەندین رۆژە سوپای پاسداران هێزێکی زۆری لە ناوچە کوێستانییەکانی کۆساڵان سەر بە شاری سەوڵاوا لە پارێزگای سنە کۆکردووەتەوە و بە چەکی جۆراوجۆر ئەو ناوچەیە تۆپباران دەکات.

 

فەرماندەیی یەکینەکانی پاراستنی رۆژهەڵاتی کوردستان - یەرەکە، کە باڵی چەکداریی پارتی ژیانی ئازادی کوردستان - پژاکە، رۆژی هەینی 16-06-2023 راگەیێندراوێکی لەبارەی ئۆپەراسیۆنی سوپای پاسداران لە ناوچەی کۆساڵانی سەر بە شاری سەوڵاوای پارێزگای سنە بڵاوکردەوە و رایگەیاند، هێرشی زەوینی و ئاسمانی هێزەکانی ئێران بۆسەر چەکدارەکانیان بەردەوامە.

 

بەپێی راگەیێندراوەکە، لە هەندێک شوێن شەڕ لەنێوان چەکدارەکانی پژاک و هێزەکانی ئێران روویداوە و لە ئەنجامدا ژمارەیەک لە ئەندامانی هێزەکانی ئێران کوژراو و بریندار بوون. 

 

یەرەکە دەڵێت، زیانی گیانی بە گەریلاکانیان نەکەوتووە، بەڵام بەهۆی ئۆپەراسیۆنەکەوە ژینگە و سرووشتی ناوچەی کۆساڵان زیانی زۆری بەرکەوتووە و کاریگەریی نەرێنی لەسەر ژیانی خەڵک لە ناوچەی هەورامان دروستبووە.

 

ئۆپەراسیۆنەکەی سوپای پاسداران لە بەرەبەیانیی رۆژی دووشەممە 12-06-2023ـەوە دەستیپێکردووە. فەرماندەی قەرارگەی حەمزە و فەرماندەی سوپای پاسداران لە پارێزگای سنە رۆژی چوارشەممە 14-06-2023 بڵاویانکردەوە، هێزەکانیان هەندێک ناوچەی "گرنگ و ستراتیژی" ئەو ناوچەیەیان کۆنترۆڵکردووە.