دەسەڵاتی دادوەریی ئێران دۆسیەیەکی بۆ دادگاییکردنی محەممەد جەواد زەریف کردەوە

 

بە گوتەی خوداییان، ئەو دۆسیەیە لەلایەن وەزارەتی ئیتلاعات و رێکخراوی ئیتلاعاتی سوپای پاسدارانەوە پێکهێنراوە و لێکۆڵینەوەی بۆ دەکرێت. دەشڵێت: "دۆسیەکە لە ژێر چاودێریی داواکاریی گشتیدایە و لێپرسینەوە لە ژمارەیەکی زۆر لە کەسایەتییە سیاسییە پەیوەندیدارەکان کراوە".

 

بەپێی یاسای ئێران، هەر دۆسیەیەکی دادوەریی دوای تەواوبوونی لەلایەن داواکاری گشتییەوە، رادەستی دەسەڵاتی دادوەریی دەکرێت بۆ دادگاییکردن. پێشتر دەسەڵاتی دادوەریی ئێران، لەسەر ئەو بابەتە رایگەیاندبوو، ژمارەیەک کەس لێپرسینەوەیان لەگەڵدا کراوە و ژمارەیەکیش چوونە دەرەوەیان لە وڵات قەدەخە کراوە. 

 

دوو مانگ پێش تەواوبوونی کابینەی حەسەن روحانی، فایلێکی دەنگیی محەممەد جەواد زەریف بڵاوبووەوە، تێیدا باس لە دەستێوەردانی، قاسم سولەیمانی، لە سیاسەتی دەرەوەی ئێران دەکات، هەروەها ئاگاداربوونی بەرپرسانی باڵای کۆماری ئیسلامیی ئێران لە خستنەخوارەوەی فڕۆکە ئۆکراینییەکە لە تاران، لەگەڵ ناڕەزایەتی رووسیا بە رێککەوتنی ئەتۆمی.