پەرلەمانی ئێران: ژینا ئەمینی لێی نەدراوە

 

پێشتر پەرلەمانی ئێران کۆمیتەیەکی بە ناوی "کۆمیتەی ئاشكراکردنی راستییەکانی" بۆ لێکۆڵینەوە لە گیان لەدەستدانی ژینا ئەمینی لە بنکەی پۆلیسی تاراندا پێکهێنا. ئەمڕۆ یەکشەممە 16-10-2022، کۆمیسیۆنی کاروباری ناوخۆیی وڵات و ئەنجوومەنەکانی پەرلەمان ئەنجامەکانی لێکۆڵینەوەکەیان بڵاوکردەوە.

 

لە راپۆرتی پەرلەمانی ئێراندا هاتووە، سەرەڕای ئەوەی پەرلەمانتارەکانی ئەندامی ئەو کۆمیتەیە زۆریان هەوڵداوە خێزانی ژینا ئەمینی لەگەڵیان کۆببنەوە، بەڵام قبووڵیان نەکردووە. 

 

دادپزیشکی تارانیش رۆژی 07-10-2022 رایگەیاند: ژینا ئەمینی لێی نەدراوە. هۆکاری گیانلەدەستدانی گەڕاندەوە بۆ "نەشتەرگەری و نەخۆشییەک کە لە سەردەمی منداڵیی لە مێشکیدا هەبووە." 

 

لە بەرامبەردا کەسوکار و پارێزەری خێزانی ژینا ئەمینی ئەنجامی راپۆرتەکەی دادپزیشکی تارانیان رەتکردەوە و رایانگەیاندووە، "بۆچوونی هیچ کەس و پزیشکێکیان قبوڵ نییە تاوەکو ئەو کاتەی پزیشکی جێی متمانەی خۆیان رازی نەبێت."

 

ژینا ئەمینی رۆژی 13-09-2022 لە تاران لەلایەن پۆلیسی رەوشتەوە دەستبەسەر کرا، لە بنکەی پۆلیس تەندروستیی تێکچوو و 3 رۆژ دواتر لە نەخۆشخانەیەکی تاران گیانی لەدەستدا. وەک باوکی ژینا دەڵێت، دوای دەستگیرکردنی کوژراوە.