رووداو دیجیتاڵ
وەزارەتی تەندروستیی ئێران تووشبوونی 92 هاووڵاتی ئێرانی بە تای خوێنبەربوون راگەیاند و دەڵێت، سێ کەسیان گیانیان لەدەستداوە.
رۆژی یەکشەممە، 16ـی حوزەیرانی 2024، حوسێن فەرشیدی، جێگری وەزیری تەندروستی ئێران رایگەیاند: "لە ماوەی یەک مانگدا 92 هاووڵاتی تووشی تای خوێنبەربوون بوون".
جێگری وەزیری تەندروستی ئێران دەڵێت: "مرۆڤ بەهۆی پێوەدانی جۆرە مێشوولەیەک بە ناوی Aedes تووشی نەخۆشی تای خوێنبەربوون دەبێت. لە کۆی ئەو 92 تووشبووەی تۆمارکراون، 90 کەسیان لە دەرەوەی ئێران بوون و گەڕاونەتەوە".
حوسێن فەرشیدی پێیوایە، دەبێ رێکارەکان بۆ هاتووچۆی هاووڵاتییان لە دەروازە سنوورییەکانەوە تووندوتۆڵ بکرێن و پشکنین بۆ ئەو کەسانە بکرێت گومانی تووشبوون بەو نەخۆشییەیان لێ دەکرێت.
سێ کەس لە تووشبووەکان گیانیان لەدەستداوە و جێگری وەزیری تەندروستی وڵاتەکە دەڵێت: "دوو لەو هاووڵاتییانە لە ئیمارات و ئەوی دیکەیان لە ئێران گیانی لەدەستداوە"؛ ئاماژەی بەوەشکرد: "چوار ساڵە تای خوێنبەربوون لە ئێران بەربڵاوە و بەگوێرەی چاودێری و بەدواداچوونەکانی وەزارەتی تەندروستی بۆمان دەرکەوتووە، 80٪ـی تووشبووان بەو نەخۆشییە لە پارێزگای فارسن".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ