رووداو دیجیتاڵ
لە هێرشێکی چەکداریدا بۆ سەر بارەگایەکی هێزەکانی پۆلیس لە پارێزگای سیستان و بەلووچستاندا لە باشووری رۆژهەڵاتی ئێران، 11 پۆلیس کوژران. میدیاکانی ئێرانیش دەڵێت، "جەیشولعەدل" لە پشت هێرشەکەوەیە.
ئەمڕۆ هەینی، 15-12-2023، عەلیرەزا مەرحەمەتی، جێگری پارێزگاری سیستان و بەلووچستان بۆ کاروباری ئەمنی بە میدیای فەرمیی ئێران رایگەیاند، بەرەبەیانی ئەمڕۆ هێرش کراوەتە سەر بارەگای هێزەکانی پۆلیسی راسک و بە هۆیەوە 11 کەس لە هێزەکانی پۆلیس کوژراون.
ناوەندی راگەیاندنی پۆلیسی سیستان و بەلووچستانیش لە راگەیێندراوێکدا هێرشەکەی پشتڕاستکردەوە و رایگەیاند، "نیوەشەوی رابردوو لەلایەن تیرۆریستەکانەوە بەشێوەیەکی ناجوامێرانە هێرشکراوەتەوە سەر بارەگای هێزەکانی پۆلیس لە قەزای راسک."
بەگوێرەی میدیای ئێران، گرووپی جەیشولعەدل، کە گرووپێکی چەکداری بەلووچەکانە، بەرپرسیاریێتی هێرشەکەیان لە ئەستۆ گرتووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ