لە ئێران سێ بوومەلەرزە روویاندا و 11 کەس بریندار بوون

 

 

بەپێی راپۆرتی ناوەندی تۆمارکردنی بوومەلەرزەی ئێران، بوومەلەرزەکەی سیستان و بەلووچستان کاژێر 04:58 خولەکی بەرەبەیانیی رۆژی پێنجشەممە، 14ـی تشرینی دووەمی 2024 روویداوە و گوڕەکە 4.2 پلەی رێختەر بووە.

 

ناوەندەکە رایگەیاندووە، چەقی بوومەلەرزەکە لە شارۆچکەی نوسرەت ئاوای سەر بە شاری زاهیدان بووە و لە قووڵایی 10 کیلۆمەتر تۆمارکراوە.

 

مەجید موحیبی، بەڕێوەبەری گشتیی کۆنترۆڵی قەیرانی پارێزگای سیستان و بەلووچستان رایگەیاندووە، چەندین تیمی فریاکەوتنیان ناردووە شوێنی بوومەلەرزەکە و بە پێی زانیارییەکان، بوومەلەرزەکە زیانی نەبووە.

 

هەروەها بەرەبەیانیی ئەمڕۆ بوومەلەرزەیەک بە گوڕی 4.3 پلەی رێختەر دوو شاری کاشمەر و توربەت حەیدەرییە لە پارێزگای خوراسانی رەزەویی هەژاند.

 

ناوەندی تۆمارکردنی بوومەلەرزەی ئێران رایگەیاند، بوومەلەرزەکە کاژێر 05:25 خولەکی بەرەبەیانی رۆژی پێنجشەممە روویداوە، چەقی بوومەلەرزەکە لە دووری 14 کیلومەتر لە شاری کاشمەر بووە و لە قووڵایی 10 کیلۆمەتر تۆمارکراوە.

 

قایمقامی کاشمەر رایگەیاند، بەهۆی بوومەلەرزەکەی بەرەبەیانیی ئەمڕۆ 11 کەس بریندار بوون، دواتر لەلایەن تیمەکانی فریاکەوتنەوە بۆ نەخۆشخانە و ناوەندە تەندروستییەکان گوێزرانەوە.

 

حوجەتوڵڵا شەریعەتمەداری، قایمقامی کاشمەر گوتی، شەش لە بریندارەکان دوای وەرگرتنی چارەسەر رەوانەی ماڵەوە کران و پێنج برینداری دیکە لە نەخۆشخانە چارەسەر وەردەگرن.

 

بە گوتەی قایمقامی شارەکە، ئەو کەسانەی بریندار بوون، لە کاتی راکردن بۆ پاراستنی گیانی خۆیان و کەوتوون.

 

بەیانیی ئەمڕۆ بوومەلەرزەیەکی دیکەش لە شاری بهابادی سەر بە پارێزگای یەزد لە نێوەڕاستی ئێران روویدا.

 

بەپێی ناوەندی تۆمارکردنی بوومەلەرزەی ئێران، بوومەلەرزەکە کاژێر 08:19 خولەکی ئەمڕۆ لە دەورووبەری شاری بهاباد بووە، گوڕی بوومەلەرزە 4.1 پلەی رێختەر بووە و لە قووڵایی 10 کیلۆمەتر تۆمارکراوە.

 

بەڕێوەبەرایەتی کۆنترۆڵی قەیرانی یەزد رایگەیاندووە، بەپێی زانیارییە سەرەتاییەکان بوومەلەرزەکە زیانی نەبووە.