ئەو رۆژنامەڤانانەی لەسەر دۆسیەی ژینا ئەمینی دەستگیرکرابوون بە کەفالەت ئازاد کران

 

دادگەی تێهەڵچوونەوەی پارێزگای تاران ئەمڕۆ (یەکشەممە، 14ـی کانوونی دووەمی 2024) بڕیاری دا نیلوفەر حامدی و ئێلاهە محەممەدی، دوو رۆژنامەڤانە زیندانیکراوەکە بە کەفالەتی 10 ملیار تمەن (نزیکەی 200 هەزار دۆلار) بۆ هەر یەکێکیان، بە شێوەیەکی کاتی و تاوەکو دەرچوونی بڕیاری کۆتایی دادگەکە لەسەر تانەی ئەو دوو رۆژنامەڤانە، ئازاد بکرێن.

 

ژینا ئەمینی، کچە کوردەی خەڵکی سەقزی رۆژهەڵاتی کوردستان لە مانگی ئەیلوولی ساڵی 2022 بە تۆمەتی "پابەندنەبوون بە باڵاپۆشی" لە تاران دەستگیر کرا و، دواتر بە شێوەیەکی گوماناوی گیانی لەدەستدا. 

 

نیلوفەر حامدی، رۆژنامەڤانی رۆژنامەی شەرق و ئێلاهە محەممەدی، پەیامنێری رۆژنامەی هەم میهەنی ئێرانی، ساڵی 2022 لەبارەی دەستگیرکردن، گیانلەدەستدان و رێوڕەسمی بەخاکسپاردنی ژینا ئەمینی راپۆرتە هەواڵیان بڵاوکردبووە، دواتر لە کاتی بەڕێوەچوونی خۆپێشاندانەکان لە رۆژهەڵاتی کوردستان و ئێران، دەستگیرکرابوون. 

 

ئێلاهە محەممەدی بە تۆمەتی هاوکاریکردنی ئەمریکا، ئەنجامدانی تاوان لە دژی ئاسایشی وڵات و کارکردن لە دژی ئاسایشی نەتەوەیی ئێران، لەلایەن دادگەی تاوانەکانی تارانەوە سزای 12 ساڵ زیندانیکردن بەسەریدا سەپێنرا. هەروەها دادگە بە هەمان تۆمەت سزای 13 ساڵ زیندانیکردنی بەسەر نیلوفەر حامدیدا سەپاند.

 

میدیای ئێران رایگەیاندووە، دوو رۆژنامەڤانەکە چوونەدەرەویان لێ قەدەخە کراوە و، تاوەکو کاتی دەرچوونی بڕیاری دادگەی تێهەڵچوونەوە، بە کەفالەتی 10 ملیار تمەن، لە دەرەوەی زیندان دەبن.