بەرپرسانی ئێران لەدوای سەرکەوتنی ترەمپ دەڵێن، لەگەڵ ئەمریکا ئامادەی دانووستانن

 

عەباس عێراقچی، وەزیری دەرەوەی ئێران رایگەیاندووە: "لەبارەی پرسی ئەتۆمی، هەمیشە پێمان باش بووە دانوستاندن بکەین. هیچ کات مێزی دانوستاندنمان جێ نەهێشتووە و ئەوە رۆژئاواییەکان بوون کە پابەندییەکانیان جێبەجێ نەکرد و ئەمریکا بوو لە رێککەوتن چووە دەرەوە، بۆیە ئەگەر سەرپێچی و پێشێلکارییەک کرابێ، لەلایەن ئەمریکا و وڵاتانی ئەورووپییەوە بووە. ئێمە ئامادەی دانوستاندنین و ئامادە دەبین ئەگەر بەرژەوەندییەکانمان دابین بکرێن."

 

ئەوە لە کاتێکدایە، هەفتەیەک پێش هەڵبژاردنی سەرۆکایەتیی ئەمریکا، وەزارەتی دەرەوەی ئێران رایگەیاند، دانوستاندنە ناڕاستەوخۆکانی لەگەڵ ئەمریکا هەڵپەساردووە.

 

ئیسماعیل بەقایی- گوتەبێژی وەزارەتی دەرەوەی ئێران دەڵێت: "دانوستاندنی ناڕاستەوخۆ لەنێوان ئێران و ئەمریکا بە دیاریکراوی لەسەر بابەتی ئەتۆمی بوو. هەفتەی پێشوو رامگەیاند، بەهۆی رووداوەکانی چەند هەفتەی رابردوو، بە کردەوە هەڵمانپەساردووە."

 

لەدوای هەڵبژاردنەکانی ئەمریکا دۆخەکە گۆڕاوە و ئێستا بەرپرسانی ئێران شتی جیاوازتر دەڵێن.

 

عەباس موقتەدایی، جێگری سەرۆکی لێژنەی ئاسایشی نیشتمانی و سیاسەتی دەرەوەی پەرلەمانی ئێران بە ئاماژەدان بە سەرکەوتنی ترەمپ دەڵێت، "دانوستاندن لە نێوان ئێران و ئەمریکا لە ئارادایە، بەڵام جارێ بەرژەوەندی ئێمە لەوەدایە دانوستاندنەکان ناڕاستەوخۆ بن."

 

ترسی ئێران لە دەستپێکردنەوەی کەمپینی ئەوپەڕی گوشاری دارایی ئەمریکا دژ بەو وڵاتە و هەڵوێستە تووندەکانی ترەمپ و بەرپرسانی کابینەکەی و ئەگەری ئاوەڵاکردنی دەستی ئیسرائیل، هاندەر بووە بۆ ئەوەی زمانی تاران بەرامبەر واشنتن بگۆڕێت، بەڵام جارێ دیار نییە ئەو گۆڕانکارییە دەگاتە رێککەوتنی سەر کاخەز یان نا.