بەڤیدیۆ: ئێران هەڵدانی مووشەکی بالیستی لەسەر کەشتی تاقیدەکاتەوە

 

 

ئەمڕۆ سێشمەممە، میدیای فەرمیی ئێران بڵاویکردەوە، هێزی ئاسمانیی سوپای پاسداران و هێزی دەریایی سوپای پاسداران "بە سەرکەوتوویی" مووشەکێکی بالیستی دوورمەودایان تاقیکردەوە.

 

میدیای ئێران ئەوەشی راگەیاندووە، "بەو داهێنانە نوێیە، توانا و کاریگەری هێزی دەریاییمان گەیشتووەتە ئەو ئاستەی دەمانەوێت".

 

وەک سوپای پاسداران دەڵێت، ئامانجی مووشەکەکە لە دەشتەکانی نێوەڕاستی ئێران دیاریکرابوو و هاوشێوەی بنکەیەکی هێزی ئاسمانیی ئیسرائیل دروستکرابوو.

 

بەگوێرەی سوپای پاسدارانی ئێران، ئەو مووشەکەی تاقیکراوەتەوە لانیکەم هەزار و 700 کیلۆمەتر دەبڕێت.

 

ئێران بەردەوام جەختی لەوە کردووەتەوە کە نایەوێت چەکی ئەتۆمی بەرهەم بهێنێت و دەڵێت، مووشەکەکانی تەنیا بۆ بەرگریکردنن.

 

هەواڵگریی ئەمریکا پێی وایە، ئێران خاوەنی زیاتر لە سێ هەزار مووشەکی بالیستییە و ساڵ دوای ساڵیش ژمارەیان زیاتر دەبێت و پێشکەوتووتریش دەبن.