رووداو دیجیتاڵ
سوپای پاسدارانی ئێران دەڵێت، مووشەکێکی دوورمەودای بالیستی لەسەر کەشتییەکی جەنگی بە سەرکەوتوویی تاقیکردووەتەوە.
ئەمڕۆ سێشمەممە، میدیای فەرمیی ئێران بڵاویکردەوە، هێزی ئاسمانیی سوپای پاسداران و هێزی دەریایی سوپای پاسداران "بە سەرکەوتوویی" مووشەکێکی بالیستی دوورمەودایان تاقیکردەوە.
میدیای ئێران ئەوەشی راگەیاندووە، "بەو داهێنانە نوێیە، توانا و کاریگەری هێزی دەریاییمان گەیشتووەتە ئەو ئاستەی دەمانەوێت".
وەک سوپای پاسداران دەڵێت، ئامانجی مووشەکەکە لە دەشتەکانی نێوەڕاستی ئێران دیاریکرابوو و هاوشێوەی بنکەیەکی هێزی ئاسمانیی ئیسرائیل دروستکرابوو.
بەگوێرەی سوپای پاسدارانی ئێران، ئەو مووشەکەی تاقیکراوەتەوە لانیکەم هەزار و 700 کیلۆمەتر دەبڕێت.
ئێران بەردەوام جەختی لەوە کردووەتەوە کە نایەوێت چەکی ئەتۆمی بەرهەم بهێنێت و دەڵێت، مووشەکەکانی تەنیا بۆ بەرگریکردنن.
هەواڵگریی ئەمریکا پێی وایە، ئێران خاوەنی زیاتر لە سێ هەزار مووشەکی بالیستییە و ساڵ دوای ساڵیش ژمارەیان زیاتر دەبێت و پێشکەوتووتریش دەبن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ