باڵەخانەی وەزارەتی دەرەوەی یەمەن
رووداو دیجیتاڵ
دوای حەوت ساڵ دابڕان، سعودیە بە نێوەندگیریی چین، پەیوەندییەکانی لەگەڵ ئێران ئاساییکردەوە و یەمەن گرنگترین گۆڕەپانە کە سعودیە مەبەستیەتی رەنگدانەوەی دۆخە نوێیەکەی پێوە دیاربێت. شاندێكی سعودیش گەیشتووەتە سەنعا و لەگەڵ بەرپرسانی حووسی کۆبووەوە.
عەبدولئیلاهـ هەجار، راوێژکاری باڵای حووسییەکان دەڵێت، "لەم قۆناخەی ئێستادا دەست بە گفتوگۆی راستەوخۆ کراوە و لەم سەردانەی شاندە سعودییەکە باس لە شێوازی رێککەوتنمان دەکەین، بەڵام سەرەتا دەبێت سعودیە هەموو بەرپرسیارێتیی دووژمنکاریی 8 ساڵەی رابردووی بۆ سەر گەلی یەمەن بە تەواوەتی هەڵگرێت."
لە ئاداری 2015وە، هاوپەیمانێتییەک بە ئەندامێتی 9 وڵات بە سەرۆکایەتیی سعودیە دەستوەردانی سەربازییان لە یەمەندا کرد بۆ شکستهێنان بە چەکدارە حووسییەکان، کە ئەو کاتە بە هاوکاریی ناڕاستەوخۆی ئێران، سەنعای پایتەخت و زۆربەی ناوچەکانی باکوور و ناوەڕاستی وڵاتیان کۆنترۆڵ کردبوو.
لەدوای هەشت ساڵ لە هەڵگیرسانی شەڕی یەمەن، ئێستا نەخشە مرۆییەکە بە گوتەی نەتەوە یەکگرتووەکان بەم جۆرەیە: لە کۆی 30 ملیۆن یەمەنی، شەڕەکە بووەتە هۆی کوژرانی 377 هەزار کەس؛ 20 ملیۆن کەس پێویستیان بە هاوکاریی مرۆییە؛ 14.5 ملیۆن کەس خۆراکی پێویستیان نییە و چوار ملیۆن کەسیش ئاوارەن.
نەخشەی دابەشکردنی هێزیش بەو جۆرەیە کە خاکی یەمەن لەژێر دەسەڵاتی حووسییەکان، حکومەتی دانپێدانراوی یەمەن بە پاڵپشتی سعودیە، چەکدارانی پاڵپشتیکراو لەلایەن ئیمارات و هەندێک شوێنی یەکلانەبووە دابەش بووە.
نەتەوە یەکگرتووەکان کە چەند ساڵێکە هەوڵی ئاشتی دەدات و تەنیا ئەم دواییە بە ئاگربەستێكی چەند مانگە گەیشت، پشتگیری لە هەنگاوەکە دەکات.
ستیفان دوژاریک، گوتەبێژی سکرتێری گشتیی نەتەوە یەکگرتووەکان دەڵێت، "بەلای ئێمەوە، هەنگاوێکی پێشوازیلێکراوە لەپێناو داکشانی گرژی و ئاڵۆزییەکانی یەمەن و ناوچەکە."
لەسەر دیواری باڵیۆزخانە داخراوەکەی سعودیە لە سەنعای یەمەن، وێنەی ئاڵای ئەمریکا لەسەر رووخسارێكی سعودی بە رەنگی سووری خوێن کێشراوە، کە لەوانەیە ئاماژەیەک بێت لەسەر سەختی و ئاڵۆزیی بارودۆخەکە لە وڵاتێکی پڕ لە هێزی سەر بە وڵاتانی دیکە، کە بەردەوام شەڕی بە وەکالەت دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ