رووداو دیجیتاڵ
هاوژینی عەلیڕەزا ئەکبەری، جێگری وەزیری پێشووی بەرگریی ئێران ئاشکرای کرد، هاوژینەکەی سێ ساڵە بە تۆمەتی "سیخوڕیکردن" دەستبەسەر کراوە و بە لەسێدارەدان سزا دراوە.
مریەم ئەکبەری بە میدیاکانی راگەیاندووە، هاوژینەکەی بۆ ژووری تاکەکەسی گواستراوەتەوە و بڕیارە ئەم هەفتەیە بڕیار لەسەر چارەنووسی بدرێت، بۆیە هەواڵەکەی ئاشکرا کردووە.
عەلیڕەزا ئەکبەری کەسێکی نزیک لە عەلی شەمخانی، سکرتێری ئەنجوومەنی باڵای ئاسایشی نیشتمانیی ئێرانە و لە کابینەی محەممەد خاتەمی لە نێوان ساڵەکانی 1997 بۆ 2005 کە شەمخانی وەزیری بەرگریی ئێران بوو، عەلیڕەزا ئەکبەری جێگری بوو. دواتریش وەکو راوێژکاری شەمخانی و سەرۆکی دامەزراوەی لێکۆڵینەوە ستراتیژییەکان لە ئێران کاری کردووە.
ژمارەیەک میدیای ئێران بێ ناوهێنان بڵاویانکردووەتەوە، بەرپرسێکی باڵای پێشووی ئەو وڵاتە بە تۆمەتی "سیخوڕی" دەستبەسەر کراوە، بەڵام دەزگای داد و حکومەتی ئێران تائێستا هیچیان لەو بارەوە رانەگەیاندووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ