لە خوزستانی ئێران بەهۆی تەقینەوەی گاز شەش کەس گیانیان لەدەستدا

 

وەحید شەحبانی، بەرێوەبەری گشتی مانگی سووری خوزستان رایگەیاند، رووداوەکە بەرەبەیانی ئەمرۆ پێنجشەممە لە گوندی لالبی سەر بە شاری باغمەلیک روویداوە و دوای ئاگادارکردنەوەیان، سێ تیمی فریاکەوتنیان بۆ شوێنی رووداوەکە ناردوون.

 

بەگوتەی شەعبانی، رووداوەکە بەهۆی تەقینەوەی گازی ماڵێک بووە و بەوهۆیەوە 6 کەس گیانیان لەدەستداوە. گوتیشی لێکۆڵینەوە لەبارەی رووداوەکە دەستپێکردووە بۆ ئەوەی هۆکاری تەقینەوەکە ئاشکرا بکرێت.

 

لادانی پاشماوەی خانووە رووخاوەکە و هەروەها دەرهێنانی تەرمی ئەو شەش کەسە نزیکەی دوو کاژێری خایاند.

 

عارف ئەسل شەرهانی، بەرێوەبەری پەیوەندییە گشتییەکانی فریاکەوتنی خێرای خۆزستانیش راگەیاندووە، لە رووداوەکەدا دوو منداڵی 8 و 12 ساڵان، سێ پیاوی 22، 25 و 60 ساڵان و هەروەها ژنێکی 50 ساڵان گیانیان لەدەستداوە.

 

لای خۆیەوە، جەواد شەریفی، بەڕێوەبەری مانگی سووری باغمەلیک گوتی، "ئەمرۆ پێنجشەممە 10-8-2023 لە گوندی لالوب لە ئەنجامی تەقینەوەی گاز خانوویەک رووخا، بە ناردنی 3 تیمی سەر بە کۆمەڵەی مانگی سوور بۆ ناوچەکە، پرۆسەی هەڵگرتنی پاشماوەی خانووە رووخاوەکە بەڕێوەچوو و بە هاوکاری قایمقام و لایەنە پەیوەندیدارەکان پرۆسەکە کۆتایی هات."