رووداو دیجیتاڵ
ئاگر لە پاڵاوگەی نەوتی بەندەرعەباس لە باشووری ئێران کەوتەوە و و بەهۆیەوە کەسێک گیانی لەدەستداوە و سێ کەسی دیکەش بریندارن.
میدیای ئێران بڵاوی کردەوە، ئەمڕۆ پێنجشەممە، 7ی ئاداری 2024، لە پاڵاوگەی نەوتی ئافتابی بەندەرعەباس لە پارێزگای هورموزگان، کە دەکەوێتە باشووری ئێران، کوورەیەکی پاڵاوگەکە تەقیوەتەوە و بەهۆیەوە ئاگر لە بەشێکی پاڵاوگەکە بەربووە.
بابایی، بەڕێوەبەری پەیوەندییە گشتییەکانی پاڵاوگەی نەوتی ئافتابی بەندەرعەباس لەبارەی رووداوەکەوە رایگەیاند، رووداوەکە کاژێر 11:30ی ئەمڕۆ بە کاتی ئێران (11:00 بە کاتی هەولێر) روویداوە و بە هۆی کێشەی تەکنیکی لە یەکێک لە کوورەکانی پاڵاوگەکە بووە.
حەبیب بەهادوری، قایمقامی بەندەرعەباس-یش رایگەیاند، لە رووداوەکەدا "کەسێک گیانی لەدەستداوە و سێ کەسی دیکەش بریندارن کە دۆخی تەندروستیی یەکێکیان زۆر خراپە."
بەپێی زانیارییەکان، ئەو کەسەی گیانی لەدەستداوە کەسێکی تەمەن 38 ساڵانە و لە کاتی لەحیمکردنی تانکییەکی پاڵاوگەکەدا بەهۆی تەقینەوەی تانکییەکە گیانی لەدەستداوە.
پاڵاوگەی نەوتی ئافتابی بەندەرعەباس لە ساڵی 1998 لەسەر رووبەری 700 هێکتار زەوی کرایەوە و توانای پاڵاوتنی 350 هەزار بەرمیل نەوتی لە رۆژێکدا هەیە، کە دەکاتە نزیکەی 18٪ی بەرهەمە نەوتییەکانی ئێران.
هەروەها لەو پاڵاوگەیە رۆژانە زیاتر لە 12 ملیۆن لیتر بەنزین بەرهەم دەهێندرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ