رووداو دیجیتاڵ
لە پاڵاوگەی نەوتی بەندەرعەباس لە باشووری ئێران بەهۆی تەقینەوەی کوورەیەکی پاڵاوگەکە ئاگرکەوتەوە و بەپێی زانیارییە سەرەتاییەکان، لە رووداوەکەدا کەسێک گیانی لەدەستداوە و سێ کەسی دیکەش بریندارن.
پاڵاوگەکە ناوی ئافتابە و لە بەندەرعەباسە لە پارێزگای هورموزگان کە دەکەوێتە باشووری ئێران.
بابایی، بەڕێوەبەری پەیوەندییە گشتییەکانی پاڵاوگەی نەوتیی ئافتابی بەندەرعەباس لەبارەی رووداوەکەوە رایگەیاند، رووداوەکە کاژێر 11:30ی ئەمڕۆ بە کاتی ئێران (11:00 بە کاتی هەولێر) روویداوە و بەهۆی کێشەی تەکنیکی لە یەکێک لە کوورەکانی پاڵاوگەکە بووە.
حەبیب بەهادوری، قایمقامی بەندەرعباس-یش رایگەیاند، "لە رووداوەکەی پاڵاوگەی نەوتی بەندەرعەباسدا کەسێک گیانی لەدەستداوە و سێ کەسی دیکەش بریندارن کە دۆخی تەندروستیی یەکێکیان زۆر خراپە."
بەپێی زانیارییەکان، ئەو کەسەی گیانی لەدەستداوە کەسێکی تەمەن 38 ساڵانە و لە کاتی لەحیمکردنی تانکییەکی پاڵاوگەکەدا گیانی لەدەستداوە.
پاڵاوگەی نەوتی ئافتابی بەندەرعەباس لە ساڵی 1998 لەسەر رووبەری 700 هێکتار زەوی کرایەوە و توانای پاڵاوتنی 350 هەزار بەرمیل نەوتی لە رۆژێکدا هەیە کە دەکاتە نزیکەی 18٪ی بەرهەمە نەوتییەکانی ئێران. هەروەها لەو پاڵاوگەیەوە رۆژانە زیاتر لە 12 ملیۆن لیتر بەنزین بەرهەم دەهێندرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ