مەسعود پزیشکیان بۆ خەڵکی ئێران: رێگەیەکی قورسمان لەپێشە

 

موحسین ئیسلامی، گوتەبێژی دەستەی هەڵبژاردن رایگەیاند "بەڕێز مەسعود پزیشکیان، براوەی 16 ملیۆن و 384 هەزار و 403 دەنگە؛ بەڕێز سەعید جەلیلی براوەی 13 ملیۆن و 538 هەزار و 179 دەنگە. بەمجۆرەش بەڕێز مەسعود پزیشکیان براوەی 14ـیەمین هەڵبژاردنی سەرۆکایەتیی وڵاتە."

 

پزیشکیان، پزیشکی نەشتەرگەریی دڵە و تێکەڵ بە جیهانی سیاسەت بووە، لە بانگەشەی هەڵبژاردنەکاندا بەڵێنی چارەسەرکردنی کێشە چەقبەستووەکانی وڵاتی بە خەڵک دەدا. 

 

جۆن گامبرێل، شرۆڤەکار دەڵێ "مەسعود پزیشکیان، ئەندام پەرلەمان و پزیشکی نەشتەرگەریی دڵ، براوەی خولی دووەمی هەڵبژاردنی سەرۆکایەتیی ئێرانە. پزیشکیان بەڵێنی داوە گوشاری کەمتر لەسەر ژنان دابنێت و پەیوەندییە ئاڵۆزەکانی ئێران لەگەڵ رۆژئاوا تاڕادەیەک ئاسایی بکاتەوە و، رێککەوتنی ئەتۆمی نوێ بکاتەوە." 

 

شەش خولی دانوستاندنی ئەتۆمی، دوا ساڵی کابینەکەی رووحانی میانڕۆ لەگەڵ وڵاتانی رۆژئاوا لە ڤییەننای نەمسا لە ساڵی 2021، بە دوو خولی گفتوگۆی شاندی ئێران لە ساڵی یەکەمی کابینە راستڕۆکەی رەئیسی، کۆتاییان پێهێنرا. 

 

پزیشکیان لە سەختیی رێگەکەی و بەجێگەیاندنی بەڵێنەکانی، باش تێگەیشتووە. 

 

ئەوەش لە یەکەمین پەیامیدا لە تۆڕی کۆمەڵایەتیی ئێکس رەنگی دایەوە، کە گوتی "خەڵکی خۆشەویستی ئێران هەڵبژاردن کۆتاییهات و ئەمە سەرەتای هاوڕێگەییمانە؛ رێگەیەکی قورسمان لەپێشە و بە بێ هاوڕێگەیی و متمانەی ئێوە، ئامانجەکان نایەنە دی. دەستم بۆ ئێوە درێژ دەکەم. سوێند دەخۆم لەم رێگەیەدا بەتەنیا جێتان نەهێڵم؛ ئێوەش من بە تەنیا جێمەهێڵن."

 

دەستووری ئێران، رێبەری ئەو وڵاتە لە سەرووی قووچەکی دەسەڵات دادەنێت، کە بەرپرسی سەرەکیی سیاسەتی دەرەوە و تاڕادەیەکی زۆریش نێوخۆ دیاری دەکات.

 

سیاسەتێكە سەعید جەلیلی، دانوستاندنکاری سەرەکیی رێککەوتنی ئەتۆمی لە سەردەمی ئەحمەدی نەژاد، نوێنەرایەتی دەکرد و گوزارشت لە لانیکەم 40٪ـی دەنگدەرانی نەریتخوازی ئێرانی دەکات، کە باوەڕیان بە کارکردن لەگەڵ رۆژئاوا نییە وەک رێگەیەک بۆ چارەسەرکردنی کێشەکان و زیاتر مەیلیان بەرەو چین و رووسیایە.

 

محەمەد پارسیانەژاد، شارەزای ئابووریی لە تارانەوە دەڵێ "نزیکی ئابووریی ئێران بە ئابووری چین، بابەتێکە کە بەدەر لە ئەنجامی هەڵبژاردن بەردەوام دەبێت، ئێران لە سەردەمی رووحانیدا رێککەوتنی درێژخایەنی لەگەڵ چین واژۆکرد و، کابینەکەی رەئیسی کە نەریتخواز بوو، درێژەی پێدا." 

 

هەڵاوسان سەرووی 40٪ـە، بێکاری لە نێو ژنان پێنج هێندەی پیاوان زیاترە، لە هەر 9 ژن، تەنیا یەکێکیان کار دەکات، ئەو رێژەیە لە پیاوان دوو بۆ سێیە.

 

ئەگەر چارەنووس رێگەی پێبدات، پزیشکیان چوار ساڵی تەمەنی سەرۆکایەتی و دوو گۆڕەپانی زۆرانبازیی لەبەردەمە؛ کە پەرلەمانێکە جمەی دێت لە زۆرینەی ئەندامی راستڕۆ و " بەیتی رێبەر"ـێکی نەریتخواز.