ئەنجامی هەڵسەنگاندنی بەربژێرەکانی هەڵبژاردنی خولی داهاتووی پەرلەمانی ئێران راگەیێندرا

 

تەحان نەزیف، گوتەبێژی ئەنجوومەنی پاراستنی دەستوور دەڵێ "زیاتر لە 21 هەزار کەس مەرجەکانی ناوتۆمارکردنیان هەبوو. لەم ژمارەیە شیاوبوونی زیاتر لە 11 هەزار کەس پشتڕاستکراوەتەوە. واتە ئەندامانی دەستەکانی چاودێریی پارێزگا و دەستەی ناوەندیی چاودێریی هەڵبژاردنەکان، شیاوبوونی زیاتر لە 52٪ـی ئەو کەسانەیان پشتڕاست کردووەتەوە، دەتوانم بڵێم 'ئەمە دوو هێندەی ئەو کەسانەیە، کە لە خولی رابردووی هەڵبژاردنی پەرلەماندا شیاوبوونیان پشتڕاستکرابووەوە.' پێموابێت بۆ هەر کورسییەک 38 کەس پێکەوە رکابەریی دەکەن."

 

لە پارێزگای ئیلام، بۆ سێ کورسی شیاوبوونی 98 کەس پەسندکراوە. لە پارێزگای سنەش شیاوبوونی 133 کەس بۆ شەش کورسی، لە لوڕستان لە کۆی 569 کەس، شیاوبوونی 284 کەس، لە کرماشان بۆ هەشت کورسی 490 کەس ناویان تۆمار کردبوو، شیاوبوونی 219 کەس پەسندکراوە. لە پارێزگای ورمێش بۆ 12 کورسیی پەرلەمان، شیاوبوونی 234 کەس پشتڕاست کراوەتەوە.

 

دوایین هەڵبژاردنی ئێران، کە هەڵبژاردنی سەرۆککۆمار بوو، لە ساڵی 2021ـدا کەمترین رێژەی خەڵک بەشدارییان تێدا کردبوو، بەڵام دوای ئەو هەڵبژاردنە، ناڕەزایەتییەکان لە بارودۆخی ئابووری زیاتر بوون، ئەمە ناڕەزایەتییەکانی ساڵی 2022ـشی بە دواداهات، کە کۆمەڵگەی بۆ سەر دوو بەش، دابەش کردووە. 

 

بەو پێیە شارەزایان پێشبینی دەکەن؛ رێژەی بەشداریی خەڵک لە هەڵبژاردندا کەمتریش ببێتەوە، بۆیە بوار رەخسێنرا ژمارەیەکی زۆر خەڵک ناویان بۆ هەڵبژاردن تۆماربکەن، لەئەنجامدا ژمارەیەکی زۆریش شیاوبوونیان پشتڕاستکراوەتەوە؛ ئەمە وەک فێڵێک بوو بۆ ئەوەی رێژەی بەشداریی لە دەنگداندا زیاد بکات.

 

عەلی خامنەیی، رێبەری کۆماری ئیسلامیی ئێران دەڵێ "لەم هەڵبژاردنەدا بەشداریی خەڵک گرنگە، واتە بەشداریی بەربڵاوی خەڵک لە هەڵبژاردندا. دەبێت گۆڕەپان بۆ رکابەریی باڵە جیاوازە سیاسییەکان کراوە بێت."

 

بەڵام ریفۆمخوازان دەڵێن، دەرفەتی یەکسان بۆ بەشداریی لە هەڵبژاردن نەڕەخسێنراوە.

 

غوڵامڕەزا کاتب، پەرلەمانتارە کە شیاوبوونی رەتکراوەتەوە، دەڵێ: پێشبینی دەکرا لە شارەکەی ئێمەدا رێژەی بەشداری زۆر بێت، بەڵام بەو بارودۆخەی ئێستا، بێگومان رێژەی بەشداری کەم دەبێت.

 

موحسین هاشمی رەفسەنجانی، سیاسەتڤانی میانڕەویش، گوتوویەتی: ئەگەر بارودۆخ هەر بەمجۆرە بێت، رێژەی بەشداریی خەڵک لە هەڵبژاردندا کەم دەبێت.

 

ئەو کەسانەی شیاوبوونیان رەتکراوەتەوە، سێ رۆژ دەرفەتیان هەیە سکاڵا تۆمار بکەن، تاوەکو پێداچوونەوە بە دۆسیەکانیاندا بکرێتەوە.