رووداو دیجیتاڵ
وەزارەتی دەرەوەی ئێران رایگەیاند، سزایان خستووەتە سەر 11 ئەفسەر و بەرپرسی پۆلیسی ئەمریکا، بەهۆی ئەوەی لە سەرکوتکردنی "خۆپێشاندانی ئاشتیانەی" خوێندکاران و مامۆستایانی زانکۆکانی ئەو وڵاتە بۆ پشتگیریکردن لە خەڵکی فەلەستین رۆڵیان هەبووە.
لە راگەیێندراوێکدا وەزارەتی دەرەوەی ئێران دەڵێت، لە چوارچێوەی جێبەجێکردنی یاسای "بەرەنگاربوونەوەی پێشێلکاریی مافی مرۆڤ و کردەوەی سەرکێشانه و تیرۆریستییەکانی ئەمریکا له ناوچەکە" و به تایبەت به پشتبەستن به مادەی پێنجەمی یاساکە، ئەو بریارەیان داوە.
بەپێی راگەیێندراوەکە، ئەو بەرپرسانەی ئەمریکا تۆمەتبارن بە "پێشێلکردنی مافەکانی مرۆڤ بەهۆی سەرکوتکردنی ناڕەزایەتی ئاشتییانەی خوێندکاران و مامۆستایانی زانکۆ لە ئەمریکا، کە بۆ پشتیوانی لە نەتەوە ستەملێکراوەکەی فەلەستین لە دژی تاوانەکانی رژێمی زایۆنی لە غەززە هەڵوێستیان نواندووە."
بریارەکە، "قەدەخەکردنی پێدانی ڤیزە بۆ ئەو کەسانە و رێگەنەدان بە چوونە ناو خاکی کۆماری ئیسلامی ئێران، بلۆککردنی هەژمارە بانکییەکانیان لە سیستەمی دارایی و بانکیی ئێران و دەستبەسەرداگرتنی موڵک و سامانیان لە خاکی ژێر دەسەڵاتی کۆماری ئیسلامیی ئێران" دەگرێتەوە.
ناوی ئەو بەرپرسانەی پۆلیسی ئەمریکا کە لەلایەن ئێرانەوە سزادراون، بەو شێوەیەیە:
1- ویلیام (بیلی) هیچنز، بەڕێوەبەری ئیدارەی ئاسایشی گشتیی ویلایەتی جۆرجیا
2- ئێدی گریر، فەرماندەی ئۆپەراسیۆنە مەیدانییەکانی ویلایەتی جۆرجیا
3- لیندا جێی ستامپ کورنیک، بەڕێوەبەری پۆلیسی زانکۆی فلۆریدا
4- پامێلا سمیس، بەڕێوەبەری پۆلیسی واشینتن دی سی
5- جێفری کارۆل، یاریدەدەری بەڕێوەبەری پۆلیسی واشنتن دی سی بۆ کاروباری جێبەجێکردن
6- کارل جاکوبسن، بەڕێوەبەری پۆلیسی نیوهاون
7- شێین ستریپی، یاریدەدەری بەڕێوەبەری پۆلیسی زانکۆی تەکساس
8- مایکل کاکس، بەڕیوەبەری پۆلیسی بۆستۆن
9- سکات دانینگ، بەڕێوەبەری پۆلیسی ناوەندیی زانکۆی ئیندیانا
10- مایکڵ تامپسۆن، بەڕێوەبەری پۆلیسی زانکۆی ئاریزۆنا
11- جان بروکی، بەڕێوەبەری پۆلیسی زانکۆی لانگبیچی کالیفورنیا
وەزارەتی دەرەوەی ئێران ئاماژە بەوە دەکات، هەموو دامودەزگەکانی کۆماری ئیسلامیی ئێران بەپێی بڕیاری لایەنە پەیوەندیدارەکان رێوشوێنی پێویست بۆ جێبەجێکردنی ئەو سزایانە دەگرنەبەر.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ