ئێران: هەشت ملیۆن تۆن گەنم بە بەهای زیاتر لە 2.4 ملیار دۆلار لە جووتیاران وەرگیراوە

 

 

لە وەڵامی محەممەد قالیباف، سەرۆکی پەرلەمانی ئێران و دوو نوێنەری پەرلەمان کە داوایان کردبوو پەلە بکرێت لە خەرجکردنی پارەی گەنمی جووتیاران، رێکخراوی بەرنامە و بودجەی ئەو وڵاتە رایگەیاند، بەپێی دوایین زانیارییەکان کە لە کۆمپانیای حکومیی بازرگانیی ئێران وەرگیراون، لە دەستپێکی وەرزی دروێنەی ئەمساڵەوە تائێستا هەشت ملیۆن و 88 هەزار تۆن گەنم لە جووتیاران وەرگیراوە.

 

لە راگەیێندراوەکەدا ئاماژە بەوە دراوە، بەهای ئەو گەنمەی تائێستا وەرگیراوە زیاتر لە 121 هەزار و 320 ملیار تمەنە (زیاتر لە 2.426 ملیار دۆلار) کە حکومەت تەنیا 61 هەزار 448 ملیار تمەن (نزیکەی 1.228 ملیار دۆلار)ی بۆ جووتیاران خەرجکردووە و نزیکەی نیوەی پارەکەش ماوە.

 

باسی ئەوەش کراوە، حکومەت ئەمساڵ لەپێناو پشتگیریکردنی جووتیاران، هەر کیلۆیەک گەنمی بە 15 هەزار تمەن وەرگرتووە، لەو بڕە 11 هەزار و 500 تمەن نرخی بنەڕەتیی گەنمە، 2000 تمەن خەڵاتی رادەستکردنەوە بۆ ناوەندە حکومییەکان و 1500 تمەنیش بۆ پشتگیریی جووتیارە.

 

رێکخراوی بەرنامە و بودجەی ئێران رەتیکردووە، لە دابینکردنی سەرمایە بۆ وەبەرهێنان لە کەرتی کشتوکاڵی ئەو وڵاتەدا هیچ کێشەیەک هەبێت و رایگەیاندووە، وەبەرهێنان لەو کەرتەدا بە سەرمایە و پارەی نێوخۆیی دەکرێت، بۆیە کێشەیەک لەو بوارەدا نییە.

 

حکومەتی ئێران رایگەیاندووە، ئەمساڵ لە پلانی دایە زیاتر لە 9 ملیۆن تۆن گەنم لە جووتیاران وەربگرێت.