وەزارەتی ئیتڵاعاتی ئێران دەستبەسەرکردنی ژمارەیەک بەهایی رادەگەیێنێت

 

 

چالاکڤانانی مافەکانی مرۆڤ شەوی رابردوو ئاشکرایانکرد، ژمارەیەک لە پەیڕەوانی ئایینی بەهایی لە تاران و چەند شارێکی دیکەی ئێران دەستبەسەر کراون و ماڵی کۆمەڵێک بەهایی دیکەش پشکنراوە.

 

بەهاییەکان لە ئێراندا کەمینەیەکی ئایینین، بەڵام ئێران بە فەرمی نایانناسێت.

 

وەزارەتی ئیتڵاعاتی ئێران ئەمڕۆ رایگەیاند، ئەو کەسانەی دەستبەسەر کراون پڕوپاگەندەیان بۆ ئایینی بەهایی کردووە و راهێنانیان بە خەڵک، بەتایبەت منداڵان، کردووە و "بە شێوەی رێکخراو برەویان بە پابەندنەبوون بە باڵاپۆشی" داوە.

 

بەپێی راپۆرتی چالاکڤانانی مافەکانی مرۆڤ، لانیکەم شەش کەس دەستگیرکراون و ماڵی زیاتر لە 20 پەیڕەوی ئایینیی بەهایی لە شارەکانی تاران، کەرەج، ساری، مەشهەد، شیراز و گورگان پشکنراون. سێ کەس لە دەستگیرکراوەکان لە رێبەرانی ئایینیی بەهایی بوون.

 

رێکخراوی نەتەوە یەکگرتووەکان، کۆمەڵگەی جیهانیی بەهاییەکان و چالاکڤانان و رێکخراوەکانی مافەکانی مرۆڤ لە چوار دەیەی رابردوودا ئێرانیان تۆمەتبار کردووە بەوەی دژی بەهاییەکان هەڵاواردن دەکات و لە مافەکانیان بێبەشیان دەکات.

 

ئێران ئەو تۆمەتانەی رەتکردووەتەوە و گوتوویەتی، تەنیا لەبەر ئەوەی پەیڕەوی ئایینی بەهایین دادگایی بکرێن یان لە خوێندن بێبەش بکرێن.

 

کۆمەڵگەی بەهاییەکان پێشتر نیگەرانیی خۆیان لەسەر دەستبەسەرداگرتنی موڵک و ماڵیان لەلایەن ئێرانەوە دەربڕیبوو. ئەوان ئێران تۆمەتبار دەکەن، دەستبەسەر موڵک و ماڵیاندا دەگرێت و بە ناوەندی "جێبەجێکردنی بڕیارەکان ئیمام خومەینی دەدرێت."