رێکخراوێک لە هەرێمی کوردستانەوە هاوکاری دەگەیێنێتە خەڵکی غەززە

 

 

عەلی گەردی، ئەندامی تیمی رێکخراوەکە، ئەمڕۆ شەممە لە میسرەوە قسەی بۆ تۆڕی میدیایی رووداو کرد و گوتی: "هاوکاری ئەو خێزانانە دەکەین ئاوارەی میسر بوون و باوک یان برایان شەهید بووە".

 

ئەو خێزانانەش کە نەخۆشیان هەیە و ئاوارەبوون، لەلایەن رێکخراوە کوردستانییەکەوە هاوکاری دەکرێن.

 

هاوکارییەکە پارە، دابینکردنی شوێن و پێدانی خۆراک دەگرێتەوە. عەلی گەردی گوتی: "زۆرینەی هاوکارییەکە پارەیە بۆ ئەوەی خێزانەکان چییان پێویست بوو خۆیان بیکڕن".

 

جۆری هاوکارییەکە بە گوێرەی کەیسەکان دەگۆڕدرێت؛ کەمترینی 100 دۆلارە و زۆرترین بڕی هاوکاریش 1000 دۆلارە.

 

رێکخراوەکە یاری بە منداڵە ئاوارەکانیش دەبەخشێت. عەلی گەردی دەڵێت: "تەواوی هاوکارییەکە لە هەرێمی کوردستان کۆکراوەتەوە؛ 80%ی دەنێرنە نێو غەززە و ئەوی دیکە بە دەستی خۆمان لەم سنوورە لەنێو میسر دەیدەینە ئاوارەکان".

 

دۆخی ئاوارەکانی غەززە لەنێو میسر باش نییە. عەلی گەردی دەڵێت، "ئەوانەی ئاوارەبوون جگە لە جلوبەرگی خۆیان هیچیان پێ نییە و پێویستیان بە هاوکارییە".

 

تیمی رێکخراوەکە نەیانتوانیوە بچێتە نێو غەززە، بەڵکو لەوێ تیمی پێکهێناوە و هاوکاری خەڵک دەکەن.

 

جەنگی غەززە لە 7ـی ئۆکتۆبەری رابردووەوە بەردەوامە و بەگوێرەی ئامارەکانی تەندروستی غەززە، تاوەکو ئێستا 40 هەزار و 435 کەس لە غەززە کوژراون و 93 هەزار و 534 کەسی دیکەش بریندار بوون، هەروەها 1.9 ملیۆن کەسیش ئاوارە بوون.