نەبوونی پێداویستییە سەرەتاییەکان تەنگی بە دانیشتووانی کەرتی غەززە هەڵچنیوە

 

 

عەبدولڕەحمان کیلانی، ئاوارەی غەززە ئاماژە بەوە دەکات، "ئارد، هاوکاری و ئاو و تەنانەت دەستشۆریشمان نییە. ماڵەکانمان خاپوور کران. کەس گرنگی بە ئێمە نادات. هاوار بۆ خەڵکی جیهان دەبەین. هەموو هێزە نێودەوڵەتییەکان دژی ئێمەن. پێویستمان بە هاوکارییە."

 

نەتەوە یەکگرتووەکان هۆشداری لەبارەی نەمانی خۆراک، سووتەمەنی و ئاوی پاک لە کەرتی غەززە دەدات. کەمبوونەوەشیان مەترسیی روودانی کارەساتی مرۆیی لەنێو 2.4 ملیۆن دانیشتووی کەرتەکە زیاتر دەکات.

 

بەگوێرەی نەتەوە یەکگرتووەکان، پێش دەستپێکردنی شەڕی نێوان گرووپە چەکدارەکانی کەرتی غەززە و ئیسرائیل لە رۆژی 7ی تشرینی یەکەمدا رێژەی هەژاری نزیکەی 80% بوو، ئەو خەڵکەش لەلایەن ئاژانسەکانی سەر بە نەتەوە یەکگرتووەکانەوە هاوکاری دەکران؛ بەڵام ئێستا رێژەکە 96%ـە.

 

دایکی سەمیر، ئاوارەی غەززە دەڵێت، "ئاوی پاکمان پێویستە، خواردنمان پێویستە، ئێمە برسین. ئەمە تەواو نادادپەروەرانەیە. منداڵەکانمان ناتوانن بخەون. پێویستە ئاو و خۆراکیان بۆ دابین بکەین."

 

دوای دەستپێکردنی شەڕی گرووپە چەکدارەکانی کەرتی غەززە و ئیسرائیل؛ ئیسرائیل گەمارۆکانی بۆسەر کەرتی غەززە تووندتر کردەوە.

 

لە 21ی تشرینی یەکەمەوە ئیسرائیل رێگەی بە گەیشتنی کەمتر لە 100 بارهەڵگر هاوکاریی مرۆیی بە کەرتی غەززە داوە، کە کەمترە لە بڕی پێویست بۆ یەک رۆژ.