رێکخراوێکی کوردی بە ناوی 'سەڵاحەدینی ئەیووبی' 54 ساڵە لە ئوردن کار دەکات

 

 

ئەوان هیچ هاوئاهەنگییەکیان لەگەڵ حکومەت و رێکخراوەکانی هەرێمی کوردستان نییە و دەیانەوێ لەرێگەی رووداوەوە دەرگایەکی پەیوەندی لەگەڵ هەرێمی کوردستان بکرێتەوە.

 

دکتۆر هەمزە محەمەد کوردی، سەرۆکی رێکخراوەکەیە و دەڵێت: "پێویستە ساڵانە چالاکیی جۆراوجۆرمان هەبێت، وەک جەژنی نەورۆز و بەرزکردنەوەی ناوی سەڵاحەدینی ئەیووبی و ئەو کارانەی کردوویەتی گرنگی پێبدەین. بۆ ماوەیەک ئەم رێکخراوە زۆر بەخاوی کارەکانی رایی دەکرد، بەڵام ئێستا جارێکی دیکە دەمانەوێ زیندووی بکەینەوە وەک خانەوادە کوردییەکان و رێکخراوێکی کوردی، من تازە بووم بە سەرۆکی ئەم رێکخراوە و هیچ هاوئاهەنگییەکمان [لەگەڵ دامەزراوەکانی هەرێمی کوردستان] نییە و هیوادارین لە داهاتوو دا پەیوەندی و هاوئاهەنگیمان هەبێت." 

 

بەپێی ئامارێکی رێکخراوی سەڵاحەدینی ئەیووبی، نزیکەی 80 هەزار کورد لە ئوردن هەن.

 

عەبدولهادی یوسف کوردی، ئەندامێکی رێکخراوەکەیە و دەڵێت: "[کتێبی] 'ئوردن یەکەم، دواتر هاشمی؛ داهێنەری شکۆی مێژوو' کە فراس فائز مەسعود کوردی نووسیویەتی، ئەم کتێبە باس لە دەوڵەتی هاشمی و رۆڵی کورد تێیدا دەکات، ئەمە گرنگترین کتێبی ئەم کتێبخانەیە." 

 

راکان محەممەد حەسەن، ئەندامێکی رێکخراوەکەیە و دەڵێت: "پاڵنەر و ئامادەبوونمان لێرە بۆ ئەوەیە ئەم رێکخراوە بەرەو پێشەوە ببەین و زمانی کوردی زیندوو بکەینەوە و زۆرترین گەنجی وەکو من و لە من بچووکتر و گەورەتر فێری زمانی کوردی بکەینەوە." 

 

لەسەرەتای دامەزراندنیەوە، مانگانە گۆڤارێکیان بە ناوی 'رۆناهی' بە زمانی کوردی چاپ دەکرا، بەڵام ماوەی 20 ساڵە هیچ رۆژنامە و گۆڤارێک لەم وڵاتە بە زمانی کوردی نییە. 

 

ئەم رێکخراوە لە 9 ئەندام پێکدێت و هەر سێ ساڵ جارێک هەڵدەبژێردرێن. ئەویش لەژێر چاودێریی وەزارەتی گەشەپێدانی کۆمەڵایەتیی ئوردن. 

 

یاسر کوردی، ئەنداێکی دیکەی رێکخراوەکەیە و دەڵێت: "وەزارەتی گەشەپێدانی کۆمەڵایەتی رێز و پێزانینی زۆری بۆمان هەبوو. رایگەیاند ئێوە لەنێو باشترین 5 رێکخراوەکانن لە شانشینی ئوردنی هاشمی."

 

هۆز و خانەوادە کوردییەکانی ئوردن بەبنچینەی دامەزراندنی شانشینی ئوردنی هاشمی دادەنرێن و نزیکەی 1200 ساڵە لەم وڵاتە وەک نەتەوەیەک بەشداری کارایان لە ئوردنی کۆن و نوێ دا هەیە. دیارترین پۆست و پلە کە کوردەکان لەم شانشینە پێی گەیشتوون پۆستی سەرۆکوەزیرانە کە لەلایەن سەعد جومعە كوردییەوە، دامەزرێنەری رێکخراوی سەڵاحەدینی ئەیووبی لە ساڵی 1967 بەڕێوەبراوە.