ژمارەیەک تەرم و پاشماوەی تەرم دوای کشانەوەی سوپای ئیسرائیل لە ناوچەیەکی غەززە دەرهێندراونەتەوە
رووداو دیجیتاڵ
لە ژمارەیەک گۆڕی بەکۆمەڵی غەززە نزیکەی 400 تەرم و پاشماوەی تەرم دۆزراونەتەوە و فەلەستینییەکان ئیسرائیل تۆمەتبار دەکەن و دەڵێن، تاوانی جەنگی کردووە.
یامین ئەبو سلێمان، ئەندامی هێزی چالاکی مەدەنیی غەززە دەڵێت، "لە گۆڕە بەکۆمەڵەکاندا، ژمارەیەکی زۆر تەرمی سڤیلی تێدایە و هەندێکیان گومان دەکرێت بە ئەنقەست کوژرابن، هەندێکی دیکەیان ئەشکەنجە دراون و گومانیش دەکەین هەندێکیان زیندەبەچاڵ کرابن."
بەگوێرەی بەرپرسانی کەرتی غەززە، ژمارەیەک گۆڕی بەکۆمەڵ لە چوار ناوچەی جیاوازی کەرتەکە دۆزراونەتەوە، دوو لە گۆڕە بەکۆمەڵەکان لەژێر نەخۆشخانەکاندا دۆزراونەتەوە و نزیکەی 400 تەرمیان تێدایە، هەندێک لە قوربانییەکان دەستیان بەسراوەتەوە.
ئەو گۆڕانە لەدوای كشانەوەی هێزەکانی ئیسرائیل لە هەندێک ناوچەی کەرتەکە دۆزراونەتەوە، بەڵام سوپای ئیسرائیل رەتیدەکاتەوە ئەوان دەستیان لەو کارەدا هەبوبێت و دەڵێن، لەکاتی گەڕان بەدوای بارمتەکاندا، هەندێک تەرمیان دۆزیوەتەوە و لەلایەن فەلەستینییەکانەوە کوژراون.
راڤینا شامداسانی، گوتەبێژی ئەنجوومەنی باڵای مافەکانی مرۆڤی نەتەوە یەکگرتووەکان دەڵێت، "تووشی شۆک بووین لە بیستنی راپۆرتی تێکدانی کۆمەڵگەی پزیشکیی ناسر و شیفا و دۆزینەوەی گۆڕی بەکۆمەڵ لەژێر کۆمەڵگاکاندا. داوای لێکۆڵینەوەیەکی سەربەخۆ و شەفاف دەکەین."
دۆزینەوەی گۆڕە بەکۆمەڵەکان لە کاتێکدایە، لەو 253 کەسەی چەکدارانی حەماس لە 7ی ئۆکتۆبەری پار بە بارمتەیان گرتن، تەنیا 129یان لەلای ئەوان ماون، 105یان لە رێککەوتنێکی یەک هەفتەیی ئازادکران و 34یشیان کوژراون.
ڤیدانت پاتێل، جێگری گوتەبێژی وەزارەتی دەرەوەی ئەمریکا دەڵێت، "ئەو تۆمەتانە، مایەی دڵگرانییە و ئێمە بە جیددی تەماشایان دەکەین. بەردەوامیشین لەوەی داوا لە حکومەتی ئیسرائیل بکەین تاوەکو زانیاریی زیاتر لەبارەی ئەو تۆمەتانە بڵاوبکاتەوە."
زیاتر لە 200 رۆژە جەنگی غەززە بەردەوامە و تائێستا زیاتر لە 34 هەزار فەلەستینی کوژراون. ئیسرائیلیش هەڕەشەی ئۆپەراسیۆن بۆ سەر شاری رەفەح دەکات، کە بە دوا خاڵی دەسەڵاتی حەماس لە غەززە دادەنرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ