سعودیە: لە مانگی رەمەزاندا رێگە دەدرێت خەڵک تەنیا یەک عومرە بکەن

 

بۆ بەجێهێنانی عومرە کە بەتایبەت لە مانگی رەمەزاندا، گوشارەکان لەسەر سعودیە زۆر زیاتر دەبن، وەزارەتی حەج و عومرەی سعودیە بڵاویکردەوە "هەموو کەس مافی یەک عومرەکردنی هەیە لە مانگی رەمەزاندا و رێگە نادرێت لەو مانگەدا دووبارەی بکاتەوە".

 

لە راگەیێندراوەکەدا هاتووە، ئەم رێکارە دەبێتە هۆی ئەوەی خەڵکی دیکە بە ئارامی و ئاسوودەیی پەرستش بکەن. هاوکات لەم مانگەدا ناتوانرێت وادەی عومرە بگۆڕدرێت، بەڵام دەتوانرێت لە رێگەی ئەپڵیکەیشنی تایبەت بە حەج و عومرە "Nusuk" کە سعودیە دروستیکردووە، وادەکەی هەڵبوەشێندرێتەوە.

 

بەگوێرەی رێنماییە نوێیەکانی وەزارەتی حەج و عومرەی سعودیە، ئەو کەسانەی ناتوانن لەو ماوەیەی دیاریکراوە عومرەکەیان بکەن، لە ئەپڵیکەیشنەکەدا ناو بە ناو وادەکەیان نوێ دەکرێتەوە. 

 

سعودیە ئەپڵیکەیشنێکی بە ناوی "Nusuk" بۆ ئەو کەسانە دروستکردووە کە حەج و عومرە دەکەن و تێیدا بە چەند زمانێک خزمەتگوزاری پێشکێش دەکرێت.

 

ئەم گۆڕانکارییانە تایبەتن بە عومرە لە مانگی رەمەزاندا و هیچ کاریگەرییەک لەسەر فەریزەی حەج دروستناکات. 

 

کاروان ستوونی، بەڕێوەبەری راگەیاندنی حەج و عومرەی هەرێمی کوردستان لە ئاداری ئەمساڵدا رایگەیاند، ساڵی رابردوو دوای رەمەزان، نرخی عومرەكردن لە هەرێمی کوردستان بۆ نزیكەی 650 دۆلار دابەزی، بەڵام ئەمساڵ نرخی عومرەیەکی ئاسایی لەنێوان هەزار و 200 بۆ هەزار و 400 دۆلارە.

 

بەڕێوەبەری راگەیاندنی حەج و عومرەی هەرێمی کوردستان بەرزبوونەوەی نرخی عومرەی بۆ داواکاریی هۆتێلی نزیک گەڕاندەوە و گوتی ئەگەر عومرەكار هۆتێلی زۆر نزیكی بووێت، نرخەكە زۆر زیاترە. هەروەها باسی لە دروستبوونی گوشارێکی زۆری وڵاتانی عەرەبی لە مانگی رەمەزان کرد و باسی لەوە کرد کە هۆتێل بەئاسانی دەستناکەوێت و نرخەکەشی گران دەبێت.