سەرەڕای هۆشدارییەکانی ئیسرائیل، بەشێک لە ئاوارەکانی غەززە گەڕانەوە ماڵەکانیان

 

 

وائیل ئەبو عومەر، بەرپرسی راگەیاندنی دەروازەی سنووری رەفەح دەڵێت، "گواستنەوەی هاوکارییەکان لە بەیانی هەینییەوە دەستیپێکردووە، نزیکەی 320 بارهەڵگر و حەوت تانکەر گاز و بەنزین دەچنە نێو غەززە".

 

بەگوێرەی رێککەوتنەکە کە بۆ چوار رۆژە، ئیسرائیل رێگەدەدات رۆژانە 130 هەزار لیتر بەنزین بچێتە نێو کەرتی غەززە، ئەمە جگە لەوەی رۆژانە 200 بارهەڵگری خۆراک و پێداویستیی سەرەتایی بۆ دانیشتووانی غەززە دابین دەکرێت.

 

هەروەها لە یەکەم رۆژی ئاگربەستدا، 13 بارمتەی ئیسرائیلی و 11 کرێکاری تایلاندی و فلیپینی لەلایەن چەکدارانی حەماسەوە ئازادکران، لەبەرامبەردا ئیسرائیل 39 بەندکراوی فەلەستینی لە کەرتی خۆرئاوا ئازاد کرد.

 

لە دۆڵی غەززە کە دەکاتە نێوەڕاستی کەرتەکە، هەندێک لە ئاوارەکان ئاگربەستەکەیان قۆستەوە و گەڕانەوە ماڵەکانیان.

 

سەرەڕای ئەوەی ئیسرائیل هۆشداریداوە نابێت غەززەییەکان لە باشوورە بەرەو باکوور بگەڕێنەوە.

 

سەفوان ئەبو عامر، ئاوارەی کەرتی غەززەیە و دەڵێت، "دەگەڕێینەوە بۆ ماڵەکانی خۆمان، بۆ ئەوەی بزانین چی بەسەرهاتووە و لە چی دۆخێکدایە. دەمانەوێت هەندێ پێداویستی وەکو جلوبەرگ و پێداویستی دیکە لەگەڵ خۆمان بهێنین. هیچ شتێکمان نییە. گازی چێشتلێنان، خواردن و خواردنەوە". 

 

سەرەڕای ئەوەی ئیسرائیل چەندینجار رایگەیاندووە شەڕ بەرامبەر چەکدارانی حەماس لە پاش ئاگربەست راناوەستێت، بەڵام ئاماژەی بەوەشکردووە، لە ئەگەری ئازادکردنی بارمتەی زیاتر، ئەوا ئەگەری درێژکردنەوەی ئاگربەستەکە بەهێز دەبێت.