رووداو دیجیتاڵ
سوپاى لوبنان رایگەیاند، توانیویانە هاووڵاتییەکی عێراقی لە دەست رفێنەرانی رزگار بکەن، کە سێ رۆژ لەمەوبەر رفێندرابوو.
رۆژی 24ـی نیسانى 2023، فەرماندەیی سوپاى لوبنان لە راگەیێندراوێکدا ئاشکرایکرد، باندێک کە خۆیان بە کارمەندى هێزى ئەمنى ناساندووە، لە 20ـی نیساندا ئەو هاووڵاتییە عێراقییەیان لە شوقەکەى خۆیدا لە شارى جونیە لە باکوورى بەیرووتى پایتەختی لوبنان رفاندووە.
فەرماندەیی سوپاى لوبنان ئاماژەى بەوە داوە هێزەکانی سوپا توانیویانە لە 23ـی نیساندا ئەو هاووڵاتییە عێراقییە لە ناوچەى شراونە لە بەیرووت رزگاربکەن.
ئەو هاووڵاتییە عێراقییە ناوى بەدر دەفار سایرە، رفێنەرانى داواى بڕێک پارەیان کردووە لەبەرامبەر ئازادکردنی. سوپا لە دوای رزگارکردنی هاووڵاتییە عێراقییەکە، رفێنەرەکانیشی دەستگیرکردووە.
نزیکەى حەوت هەزار رەوەندى عێراقى لە لوبنان دەژین کە زۆربەیان لەدواى جەنگى دووەمى کەنداو لەساڵى 1991 و دواى رووخانى رژێمى بەعس لەساڵى 2003، روویان لەو وڵاتە کردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ