رووداو دیجیتاڵ
سوپای ئیسرائیل دەڵێت، بەرپەرچی مووشەکێکیان داوەتەوە کە لە یەمەنەوە بۆ ئیسرائیل تەقێندرابوو، ئەمەش دوای ئەوەی لە نێوەڕاستی ئیسرائیل و شاری تەلئەڤیڤ زەنگی ئادارگاکردنەوە لێدرا.
رۆژی دووشەممە 24-03-2025 سوپای ئیسرائیل لە راگەیێندراوێکدا بڵاویکردەوە: "دوای ئەوەی کەمێک لەمەوبەر لە چەند ناوچەیەکی ئیسرائیل زەنگی ئاگادارکردنەوە لێدرا، مووشەکێک کە لە یەمەنەوە تەقێنرابوو خرایە خوارەوە و نەیتوانی بێتە نێو خاکی ئیسرائیل."
دوای ئەوەی ئیسرائیل لە سێشەممەی رابردوو ئاگربەستی شکاند و بۆردوومانی غەززەی کرد، ئەمە شەشەم جارە سوپای ئیسرائیل دەڵێت، مووشەکی یەمەنییان خستووەتە خوارەوە.
حووسییەکانی یەمەن کە ئێران پشتیوانییان دەکات هەڕەشەیان کردووە، ئەگەر بۆردوومانی غەززە بەردەوامبێت، لە هێرشەکانیان وەکو هاوسۆزییەک بۆ فەلەستین بەردەوام دەبن.
دوێنێ یەکشەممە، سوپای ئیسرائیل رایگەیاند، هێزی بەرگریی ئاسمانییان مووشەکێکیان خستووەتە خوارەوە کە لە یەمەنەوە تەقێنرابوو؛ دواتر حووسییەکان بەرپرسیارێتییان لە ئەستۆ گرت و گوتیان ئەوان فڕۆکەخانەی بن گۆریۆنیان لە نزیک تەلئەڤیڤ کردووەتە ئامانج.
لەوکاتەوەی جەنگی غەززە لە 7ـی تشرینی یەکەمی 2023 دەستیپێکردووە، حووسییەکان کەشتییەکانی دەریای سوور و کەنداوی عەدەنیان بە ئامانج گرتووە.
لە ماوەی ئاگربەستەکەی نێوان ئیسرائیل و حەماس لە 19-01 تاوەکو 18-03-2025 حووسییەکانیش هێرشەکانیان وەستاند. دوای دەستپێکردنەوەی هێرشەکان، ئەمریکا چەند جارێک حوسییەکانی بۆردوومان کرد.
بەپەلە و بەڤیدیۆ: حووسییەکانی یەمەن مووشەکی بالیستی دەگرنە فڕۆکەخانەی بن گۆریۆن و سوپای ئیسرائیل بەرپەرچی دەداتەوە pic.twitter.com/jnfoG4iHjg
— Rudaw (@Rudawkurdish) March 24, 2025
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ