ئەمڕۆ سەرۆککۆماری ئێران سەردانی تورکیا دەکات

 

 

بەگوێرەی راگەیێندراوێکی فەرمانگەی پەیوەندییەکانی سەرۆکایەتیی کۆماری تورکیا، لەم سەردانەدا هەشتەمین لووتکەی باڵای هاوئاهەنگیی تورکیا-ئێران بە سەرۆکایەتیی ئەردۆغان و رەئیسی لە ئەنقەرە بەڕێوەدەچێت. لە کۆبوونەوەکانیشدا پەیوەندییەکانی ئەنقەرە و تاران باسی لێوە دەکرێت و جەخت لەسەر ئەو هەنگاوانە دەکرێتەوە کە بۆ پێشخستنی پەیوەندییەکان پێویستن.

 

فەرمانگەی پەیوەندییەکانی دەرەوە هەروەها رایگەیاندووە، جگە لە پەیوەندییەکان، هێرشەکانی سەر غەززە و چەند بابەتێکی دیکەی هەرێمی مژاری گفتوگۆ دەبن. 

 

بڕیار بوو ئیبراهیم رەئیسی رۆژی 04-01-2024، سەردانی ئەنقەرە بکات، بەڵام دوای تەقینەوەکانی شاری کرمان کە رۆژی 3-1-2024 لە نزیک گۆڕی قاسم سولەیمانی، فەرماندەی پێشووی فەیلەقی قودسی سوپای پاسداران روویاندا و بوونە هۆی کوژرانی 92 کەس و برینداربوونی دەیان کەسی دیکە، سەردانەکە هەڵوەشایەوە. 

 

یەکەمین کۆبوونەوەی ئەنجوومەنی باڵای هاوکارییەکانی ئێران و تورکیا لە ساڵی 2014 کرا. دوایین کۆبوونەوەی ئەنجوومەنەکە لە 18-07-2022 بە بەشداری رەجەب تەییب ئەردۆغان لە تارانی پایتەختی ئێران بەڕێوەچوو. بڕیار بوو لە ساڵی 2023دا ئیبراهیم رەئیسی، سەرۆککۆماری ئێران سەردانی تورکیا بکات و لە کۆبوونەوەی ئەنجوومەنی باڵای هاوکارییەکانی نێوان هەردوو وڵاتدا بەشدار بێت، بەڵام دوای چەند جار دواخستنی، دواجار سەردانەکە نەکرا.