لە غەززە یەک فەردە ئارد بە زیاتر لە 94 دۆلارە

 

سوڵتان، دانیشتووی غەززەیە، بۆ پەیداکردنی خۆراک نۆرەی گرتووە و دەڵێت، "هاتووم کیسەیەک نان بکڕم، بەڵام وەک دەبینی قەیرانی نان و ئاردە؛ بە شەڕی دەستەویەخەش پاروویەکت دەستناکەوێت، منداڵەکانمان برسییانە".

 

لە غەززە یەک فەردە ئاردی 50 کیلۆیی بە زیاتر لە 94 دۆلارە؛ واتە کیلۆیەک ئارد بە نزیکەی دۆلارێك و 90 سەنت لەسەر نانەواکان دەکەوێت.

 

نانەواکان یەک کیلۆ ئارد دەکەنە هەشت نان و بە 7 دۆلاری ئەمریکی دەیفرۆشن. ئەو نرخە بۆ دانیشتووانی غەززە یەکجار گرانە و نانەواکان ناتوانن ساخی بکەنەوە.

 

بۆیە ئێستا لە غەززە دیاردەیەک سەریهەڵداوە، هاووڵاتییان ئارد بۆ نانەواکان دەبەن و ئەوانیش لەبەرامبەر هەر کیلۆ ئاردێک کە دەیکەنە نان، 40 سەنت وەردەگرن. بەمجۆرەش هەردوولا سوودمەند دەبن.

 

خەمیس، دانیشتووی غەززەیە لەسەرەی نان وەستاوە و دەڵێت، "چاوەڕێم تاوەکو نان وەرگرم، 2 کیلۆ ئاردم داوەتە نانەواکە، دەبێت 16 نانم پێ بدات، هەموو خۆراکێکمان ئێستا نانەوشکەیە، تام و شێوەی برنجم بیرچووەتەوە".

 

لە 2.2 ملیۆن هاووڵاتیی غەززە، 1.8 ملیۆنیان لە برسیێتیی توند دان. رۆژانە یەک ژەم خواردنیان دەست دەکەوێت.

 

یاسەمین عید، دانیشتووێکی غەززەیە و لەسەر ئاگری دار، تاکە ژەمی رۆژەکەی لێدەنێت. 

 

یاسەمین دەڵێت، "چەندین مانگ بەبێ خواردن رۆژمان کردەوە، زۆر جار یەک هێلکە بۆ هەموو خێزانەکەم دەکوڵێنم، ئەوەی کە لە سەتا سەتە، نووستنی من و خێزانەکەمە بە برسیەتی".

 

هانی، هاوسەری یاسەمینە و باوکی 6 منداڵە دەڵێت، پێش شەڕ لە مانگێكدا 4 فەردە ئاردیان دەکڕی؛ بەڵام ئێستا لە 4 مانگدا یەک فەردەشیان پێ ناکڕدرێت.