هاووڵاتییەکی غەززە و نۆرەی خەڵک بۆ کڕینی نان
رووداو دیجیتاڵ
بەهۆی شەڕ و داخستنی دەروازەکان بەسەر کەرتی غەززەدا لەلایەن ئیسرائیلەوە، گرفتی کەمبوونەوەی پێداویستییە سەرەکییەکان و بەرزبوونەوەی نرخ تەنگی بە دانیشتووانی غەززە هەڵچنیوە. محەممەد میسری، هاووڵاتییەکە و سەبارەت بەو ئاستەنگانەی ئاوارەکان رووبەڕووی دەبنەوە، قسەی بۆ رووداو کرد.
محەممەد میسری دەڵێت: "لە نەهامەتییەکی گەورەدا دەژین، سەرباری ئەوەی بازاڕەکان داخراون، نرخی سەوزە بەرزبووەتەوە و زۆربەی نانەواخانە و سەموونخانەکانیش داخراون. لە قوتابخانەکاندا دەژین و دوور رۆژ جارێک نانێک بۆ هەر کەسێک وەردەگرین، بەهۆی بەرزبوونەوەی نرخەوە، تەنانەت توانای کڕینی سەوزەشمان نییە. داوا دەکەین پێداویستییەکانی منداڵەکانمان دابین بکرێت. خێزانەکەمان 11 کەسن و ناتوانم تەماتەشیان بۆ بکڕم، چونکە بێکارم".
نەهامەتی و ئازاری دانیشتووانی کەرتی غەززە جۆراوجۆرە، بەتایبەتی ئەوانەی بەناچاری لە قوتابخانەکاندا دەژین، ناتوانن سەرەتاییترین پێداویستی ژیان بۆ خۆیان و منداڵەکانیان دابین بکەن.
عەبدولقادر شەواف، ئاوارەیەکە و بە رووداوی گوت، "ئاو و خۆراکمان دەستناکەوێت، دەستگەیشتین بە مادە پاککەرەوەکانیش ئەستەم بووە. کاژێر 04:00ـی بەرەبەیانی هەموو رۆژێک تا کاژێر 07:00ـی بەیانی هەوڵی کڕینی نان دەدەم، لە کۆتاییدا تەنیا یەک نانم دەست دەکەوێت، ئەویش بەهۆی قەرەباڵخی و کەمی ئاردەوە".
نەبیل قەدیح، ئاوارەیەکی دیکەیە و دەڵێت: "زیاتر لە چوار کاژێر نۆرە دەگرین بۆ ئەوەی کەمێک نانمان دەستبکەوێت، سەوزە و ئاویش دەستناکەوێت. لە دۆخێکی زۆر خراپداین، سووتەمەنیش زۆر کەمبووەتەوە، ئیدی بەبێدەنگی دەمرین، بەتایبەتی منداڵ و بەساڵاچووەکان".
رێکخراوە نێودەوڵەتییەکان، هۆشداری لە بڵاوبوونەوەی نەخۆشی لەنێو منداڵان دەدەن، بەهۆی کەمی خۆراک، ئاو و دەرمانەوە.
نەهامەتییەکانی خەڵکی کەرتی غەززە بەتایبەتی ئاوارەکان رۆژ دوای رۆژ زیاتر دەبن، ئەوەش بەهۆی نەمانی پێداویستییە سەرەکییەکان و بەرزبوونەوەی نرخەکانیان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ