رووداو دیجیتاڵ
حکومەتی کوێت بڕینی "کاتی"ـی کارەبای لە بەشێك لە ناوچەکان راگەیاند و دەڵێت، گەرمای بەتینی هاوین خواستی لەسەر کارەبا زیادکردووە و تووشی ئاستەنگ بوون لە پڕکردنەوەی ئەو خواستە.
وەزارەتی کارەبا، ئاو و وزەی کوێت لە راگەیێندراوێکدا دەڵێت، بڕینی کارەبا رۆژانە بۆ دوو کاژێر دەبێت.
ئەمە یەکەمجارە حکومەتی کوێت بڕیارێکی لەم شێوەیە بدات.
وەزارەتەکە دەڵێت: "خواست لەسەر کارەبا زیادبووە و وێستگەکانی بەرهەمهێنانیش ناتوانن پڕی بکەنەوە"، بەتایبەتی لەو کاتانەی رۆژدا کە زۆرترین خواست لەسەر کارەبا هەیە.
وەزارەتەکە باس لەوە دەکات، هۆکارەکە ئەوەیە "پلەی گەرما بەراورد بە هەمان ماوەی ساڵی رابردوو بەرزبووەتەوە".
بۆ سووککردنی گوشاری سەر وێستگەکان، حکومەتی کوێت داوا لە هاووڵاتییانی دەکات بەکارهێنانی کارەبا کەمبکەنەوە و خشتەیەکی بڕینی کارەباشی لە بەشێک لە ناوچەکان بڵاوکردووەتەوە.
کوێت یەکێکە لە گەورە بەرهەمهێنەرانی نەوت لە رێکخراوی ئۆپێک؛ یەکێکە لە گەرمترین وڵاتانی جیهانیش.
ناوەندی کەشناسیی کوێت دەڵێت، ئەمڕۆ پلەی گەرمای بەشێکی وڵاتەکە گەیشتووەتە نزیکەی 50 پلەی سیلیزی و پێشبینی دەکرێت لە رۆژانی داهاتوویشدا بەرزتر بێت.
مانگی رابردوو کوێت دوو رێککەوتنی کورتخایەنی بۆ کڕینی 500 مێگاوات کارەبا واژۆ کرد. بەپێی رێککەوتنەکان، لە مانگەکانی هاویندا 300 مێگاوات لە عومان و 200ـیش لە قەتەر دەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ