رووداو دیجیتاڵ
زیاتر لە 15 هەزار لوبنانی لە عێراقەوە گەڕاونەتەوە وڵاتەکەیان. ئەوانەی لە رێگەی گەشتی ئاسمانیشەوە گەڕاونەتەوە، لەلایەن حکومەتەوە خەرجیی گەڕانەوەیان بۆ دابین دەکرێت.
عەلی عەباس، گوتەبێژی وەزارەتی کۆچ و کۆچبەرانی عێراق، ئەمڕۆ (شەممە، 08-01-2025) بە تۆڕی میدیایی رووداوی راگەیاند "گەشتە ئاسمانییەکان بۆ گەڕانەوەی هاووڵاتییانی لوبنان لە رێگەی هێڵی ئاسمانیی عێراقییەوە دەکرێن و حکومەتی عێراق تێچووی گەڕانەوەی لوبنانییەکان دەگرێتەئەستۆ."
گوتەبێژی ئەو وەزارەتە ئەوەشی روونکردەوە "رۆژانە گەشتێکی ئاسمانی بۆ گەڕاندنەوەی لوبنانییەکان بۆ وڵاتەکەیان دەکرێت."
شەڕی نێوان ئیسرائیل و حیزبوڵڵا لە لوبنان بووە هۆی ئاوارەبوونی هەزاران لوبنانی کە بەشێکیان عێراقیان وەک پەناگە هەڵبژارد.
گوتەبێژی وەزارەتی کۆچ و کۆچبەرانی عێراق رایگەیاند "تاوەکو ئێستا زیاتر لە 3200 لوبنانی لە رێگەی گەشتە ئاسمانییەکانەوە گەڕاونەتەوە و کۆی گشتی گەڕاوەکانیش 15 هەزار کەسی تێپەڕاندووە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ