ئیسرائیل لەڕێگەی نامەوە بۆ دانیشتووانی باشووری لوبنان: ناوچەکە چۆڵ بکەن

 

ئاوارەیەکی سووریایی لە باشووری لوبنان دەڵێت: "ئیسرائیل ئەو نامانەی فڕێدایە خوارەوە و داوا دەکات ناوچەکە چۆڵبکەین."

 

لەو کاتەوەی شەڕ و پێکدادانی ئیسرائیل و حیزبوڵڵا دەستیپێکردووە، ئەمە یەکەمجارە سوپای ئیسرائیل کارێکی لەمشێوەیە بکات.

 

لە نامەکە نەخشەیەک دەردەکەوێت و ناوچەکەیان سوور کراوە، بە عەرەبی تێیدا نووسراوە: "چۆڵی بکەن، ئەوەی بمێنێتەوە وەکو تیرۆریست سەیر دەکرێت."

 

بەشێک لە دانیشتووانی ناوچەکە ناچنە ژێرباری داواکەی ئیسرائیل. ئەحمەد محەممەد، گوندنشینێکی ناوچەکەیە و گوتی: "هەندێک لە سووریاییەکان ناوچەکە بەجێدەهێڵن، چونکە هیچ شتێک بەو شوێنەیان نابەستێتەوە، بەڵام ئێمەی گوندنشین، جووتیار و ئاژەڵدارین، خاکی خۆمان جێناهێڵین."

 

سوپای ئیسرائیل دەڵێت، کەتیبەیەک سەربەخۆ ئەو کارەی کردووە و فەرماندەی گشتی پشتڕاستی نەکردووەتەوە، بۆیە لێکۆڵینەوە دەکەن.

 

شەڕی سەر سنووری باشووری لوبنان و باکووری ئیسرائیل بووەتە هۆی ئەوەی 111 هەزار و 940 کەس لە لوبنان و 94 هەزار کەس لە ئیسرائیل ئاوارە ببن. هەروەها، لە لوبنان 482 چەکدار و 141 سڤیل و لە ئیسرائیلیش 24 سەرباز و 26 سڤیل کوژراون.