رووداو دیجیتاڵ
گوتەبێژی بەڕێوەبەرایەتیی حەج و عومرەی هەرێمی کوردستان دەڵێت، ئەم ساڵ شەش حاجی خەڵکی هەرێمی کوردستان لە مەککە کۆچی دواییان کردووە؛ ئاماژە بەوەش دەکات: "لە 20ـی حوزەیرانەوە ئەو حاجییانەی لە رێگەی وشکانییەوە چوونەتە حەج، بەپێی خشتەیەکی تایبەت دەگەڕێندرێنەوە".
رۆژی یەکشەممە 16-6-2024 کاروان ستوونی، گوتەبێژی بەڕێوەبەرایەتیی حەج و عومرەی هەرێمی کوردستان بە تۆڕی میدیایی رووداوی راگەیاند: "ئەم ساڵ شەش حاجی هەرێمی کوردستان لەکاتی بەجێگەیاندنی فەریزەی حەج گیانیان لەدەستداوە کە سەرجەمیان لە ماوەی 24 کاژێری رابردوودا کۆچی دواییان کردووە".
ئەو حاجییانەی لە مەککە گیانیان لەدەستداوە:
- زینەت رەشید قادر
- رازیە عەلی
- ئاسیا عەلی
- حەمە حەسەن عەبدوڵڵا
- هەمین قادر
- ئەحمەد باڵەکی
لەبارەی کاتی گەڕانەوەی کاروانی حاجییانی هەرێمی کوردستان، کاروان ستوونی رایگەیاند: "گەڕانەوەیان بەپێی خشتەیەکی تایبەت دەبێت و لە 20ـی ئەم مانگەوە دەست بە گەڕاندنەوەی ئەو حاجییانە دەکرێت کە لە رێگەی وشکانییەوە رۆیشتوون".
ئەم ساڵ 4685 هاونیشتمانی لە رێگەی بەڕێوەبەرایەتیی گشتیی حەج و عومرەی هەرێمی کوردستانەوە چوونەتە سعودیە بۆ بەجێهێنانی فەریزەی حەج. جیا لەو ژمارەیە، کۆمەڵێک هاونیشتمانی بە "ڤیزەی یەک ساڵی" بە هەمان ئامانج چوونەتە سعودیە، بەڵام ژمارەیان نازاندرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ