پاڵەوانێکی عێراق مەدالیای زێڕ دەباتەوە و بە کاڵەکێک پێشوازی لێدەکرێت

 

حوسێن جیزانی، بەشداریی هەشتەمین پاڵەوانێتیی جۆجیتسۆی لە ئەبوزەبی کرد، لەنێو دەیان یاریزانی دیکە بووە خاوەنی مەدالیای زێڕ، بەڵام کاتێک گەڕایەوە وڵاتەکەی پێشوازی لێ نەکرا و کەسێک نەبوو لە لەلایەنی پەیوەندیدار پێی بڵێت دەستخۆش و پیرۆزە.

 

حوسێن بە تۆڕی میدیایی رووداوی گوت، "توانیمان ئەم دەستکەوتە گرنگە بەدەستبهێنین، ئەمەش بە پشتیوانی خودا و هەوڵ و ماندوبوونی تاکەکەسی و راهێنانەکانمان بوو."

 

لەبارەی هەڵوێستی لایەنەکان بەرامبەریشی ئاماژەی بەوە کرد، "بەڕاستی پشتگوێخستنی وەرزش بەگشتی و یارییە تاکەکان بەتایبەتی کێشەی گەورەن و گەنجان لەم وڵاتە بەدەستییەوە دەناڵێنن. تەنیا یاریی جۆجیتسۆ نییە یان تەنیا حوسێن نییە ئەم گرفتەی هەبێت، بەڵکو هەموو یارییە تاکەکان بەدەست پشتگوێخستن و نەبوونی پشتیوانی دەناڵێنن."

 

هەر لە هەمان پاڵەوانێتیدا محەممەد باقر بەشداریی کردبوو. توانی دوو مەدالیای برۆنزی بەدەست بهێنێت، بەڵام ئەگەر حوسێن دوای بڵاوبوونەوەی گرتە ڤیدیۆییەکانی و گوشاری تۆڕە کۆمەڵایەتییەکان لەلایەن وەزارەتی وەرزش و لاوان و یەکێتیی ناوەندی جۆجیتسۆوە دەستخۆشییەکی لێکرابێت، ئەوا محەممەد تا ئەم ساتەش کەس لێی نەپرسیوەتەوە.

 

محەممەد باقر، خاوەنی دوو مەدالیای برۆنزە و بە رووداوی گوت، "بەڕاستی ئێمە ئاواتی زیاترمان هەیە، بەڵام وەک دەبینن هۆڵەکەمان چۆنە و بەچ شێوەیەک راهێنان دەکەین. بەڕاستی هیچ پشتیوانییەکمان نییە، ئەوەی کە بەدەستی دەهێنین تەنیا بەهەوڵی خۆمان و راهێنەرەکەمانە. بەم پشتیوانییە کەمەی ئێستا هەیە، زۆر ئەستەمە بتوانین شتی زیاتر لە داهاتوودا پێشکێش بکەین. بۆیە دەبێت لایەنی پەیوەندیدار چاوی لەوە بێت کە پشتیوانییەکان زیاتر بکات بۆ وەرزش و یارییە تاکەکان." 

 

یەکێتیی ناوەندی جۆجیتسۆی عێراق هۆکاری پێشوازینەکردن و خەڵاتنەکردنی یاریزانان بۆ نەبوونی پشتیوانیی مادی لەلایەن حکومەتی عێراق و کەمی بودجە دەگەڕێنێتەوە.

 

حوسێن و یاریزانەکانی هاوڕێی کە بەشێکیان مەدالیای برۆنز و زیویان بەدەستهێنابوو، لەگەڵ ئەو دۆخەی تێیدان و نەبوونی پاڵپشتی، لە هۆڵێکی خراپ و بێ کوالێتیدا دەستیان بە راهێنان کردەوە و پەیامی کۆڵنەدانیان هەبوو.