رووداو دیجیتاڵ
لە سنوورە ئاوییەکانی پارێزگای چاناککالە لە دەریای ئیجە، بەلەمێکی کۆچبەران ژێرئاوکەوت، بەپێی نوێترین زانیارییەکان، 21 کۆچبەر خنکان، کە پێنجیان منداڵن و چوار کەسیش رزگارکراون.
بەیانی ئەمڕۆ هەینی 15ـی ئاداری 2024، بەلەمێکی چووپ، کە ژمارەیەک کۆچبەری دەگواستەوە و بەرەو یۆنان بەڕێکەوتبوون، لە سنوورە ئاوییەکانی شارۆچکەی ئێجەئابات سەر بە پارێزگای چاناککالە لە دەریای ئیجە ژێرئاو کەوت.
فەرماندەیی ئاسایشی کەناراوەکانی تورکیا، لە راگەیێندراوێکدا دوایین ئاماری قوربانییانی بڵاوکردەوە و رایگەیاند، بەداخەوە ژمارەی کۆچبەرە خنکاوەکان گەیشتە 21 کەس، کە پێنجیان منداڵن.
هەر ئەمڕۆ ئیلهامی ئاکتاش، پارێزگاری چاناککالە، لە دوو راگەیێندراوی جیاوازدا سەرەتا دۆزینەوەی تەرمی هەشت کۆچبەر و دواتریش 16 کۆچبەری راگەیاندبوو.
پارێزگاری چاناککالە ئاماژەی بەوەدا، تیمەکانی فەرماندەیی ئاسایشی کەناراوەکانی تورکیا لە رێگەی 10 بەلەم و یەخت، دوو هێلیکۆپتەر و 82 کارمەند، هەوڵی دۆزینەوەی کۆچبەرەکان دەکەن بۆ رزگارکردنیان. جەختی لەوەشکردەوە کە تاوەکو ئێستا تەنیا چوار کۆچبەر رزگارکراون.
پێشتر راشیگەیاندبوو، بەیانی ئەمڕۆ بەلەمێکی چووپ بە رێگەی قاچاخ لە هەوڵی ئەوەدابووە ژمارەیەک کۆچبەر بەرەو یۆنان بگوازێتەوە، بەڵام دوای هەشت میل رێکردنیان، ژێرئاو کەوتووە.
هاوکات، ژمارەیەکی زۆر ئەمبووڵانس لە بەندەری کاباتەپە لە چاوەڕوانیدان بۆ چارەسەرکردنی کۆچبەرە رزگاربووەکان.
رۆژی 13ـی تشرینی دووەمی 2023، لە کەناراوەکانی پارێزگای ئیزمیر بەلەمێکی کۆچبەران بەهۆی زریانەوە ژێرئاوکەوت، پێنج کۆچبەر گیانیان لەدەستدا و حەوت کۆچبەریش رزگارکران.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ