سەرۆکی ئیسرائیل: ئاگربەست هەنگاوێکی باشە بۆ گەڕاندنەوەی بارمتەکان

 

رۆژی چوارشەممە 15ـی کانوونی دووەمی 2025، ئیسحاق هێرزۆگ، سەرۆکی ئیسرائیل لە پەیامێکی تەلەڤزیۆنیدا، لەبارەی رێککەوتنی ئاگربەستی جەنگی 15 مانگەی غەززە، رایگەیاند ئەمە هەنگاوێکی گرنگ و باش بوو لە هەمان کاتیشدا پێویست بوو.

 

سەرۆکی ئیسرائیل راشیگەیاند: "هیچ بەرپرسیارێتییەکی گەورەتر، مرۆیی، جوویی، ئیسرائیلی نییە، لەوەی کوڕ و کچەکانمان بگەڕێنینەوە، جا بگەڕێنەوە بۆ ماڵەکانی خۆیان یان بەخاکبسپێدرێن." 

 

بڕیارە سبەی پێنجشەممە، کابینەی حکومەتی ئیسرائیل بە سەرۆکایەتی بنیامین نتنیاهوو، سەرۆکوەزیرانی ئیسرائیل، کۆببنەوە، بەمەبەستی واژۆکردنی رێککەوتنەکە و سەرۆکی ئیسرائیلیش داوای لە حکومەتی وڵاتەکەی کرد، ئەو رێککەوتنە پەسند بکەن و گوتیشی: "لەناخی دڵمەوە بڕوام بەوەیە ئەم هەنگاوە بەهێزتر و باشتر و یەکگرتوومان دەکات." 

 

بەگوێرەی رێککەوتنی ئاگربەستی جەنگی غەززە، رۆژی یەکشەممە، 19ـی کانوونی دووەمی 2025، ئاگربەست دەچێتە واری جێبەجێکردنەوە. لەوبارەیەوە سەرۆکی ئیسرائیل گوتی: "ئێمە بەرپرسیارین لەوەی هەندێک هەنگاو بنێین بۆ یەکگرتنەوەی خەڵکەکەکان."

 

سەرۆکی ئیسرائیل لەدرێژەی قسەکانیدا باسی لە دۆخی کەسوکاری بارمتەکان کرد و رایگەیاند: "بیرم لای ئێوەیە و بەتایبەتی ئەوانەشی کە ترسیان هەیە لەوەی ئازیزانیان لە قۆناخی یەکەمدا ناگەڕێنەوە بەگوێرەی رێککەوتنەکە." 

 

سەرۆکی ئیسرائیل ستایشی هەوڵەکانی بنیامین نەتەنیاهوو، سەرۆکوەزیرانی وڵاتەکەی و هەروەها تیمی دانوستاندنکاری ئیسرائیل، ئەمریکا، قەتەر، میسر، جۆ بایدن، سەرۆکی ئەمریکا و دۆناڵد ترەمپ سەرۆکی هەڵبژارێردراوی ئەمریکای کرد، کە هەوڵیان دا ئەو رێککەوتنە بهێننە ئاراوە.