رووداو دیجیتاڵ
میدیای ئیسرائیل دەڵێت، حیزبوڵڵا بە درۆن هێرشی کردە سەر شاری حەیفا، بەرگریی ئاسمانیی ئیسرائیل نەیتوانی بەرپەرچی بداتەوە و 67 کەس برینداربوون. دۆخی 9 لە بریندارەکان جێگیر نییە. رادیۆی سوپای ئیسرائیل رایگەیاند: "سێ کەس کوژراون."
شەوی یەکشەممە، 13-10-2024، میدیای ئیسرائیل بڵاویکردەوە، حیزبوڵڵا بە درۆن هێرشێ کردە سەر ناوچەی بنیامینا لە شاری حەیفا. زەنگی ئاگادارکردنەوە پێش هێرشەکە لێنەدرا و بەرگریی ئاسمانیش فریای بەرپەرچدانەوەی درۆنەکە نەکەوت. لە ئەنجامدا 67 کەس بریندار بوون.
دوای هێرشەکە حیزبوڵڵا بڵاویکردەوە، بە "ژمارەیەک درۆنی کامیکازی" هێرشیان کردووەتە سەر پێگەیەکی راهێنانی سوپای ئیسرائیل، لە باشووری حەیفا کە بە (کەتیبەکانی گۆلان) ناسراوە. بزووتنەوە لوبنانییەکە رایگەیاند: "هێرشەکە وەڵامێک بوو بۆ هێرشەکانی رۆژی پێنجشەممەی رژێمی زایۆنی بۆ سەر گەڕەکەکانی بەستە و نوەیری لە نێوەڕاستی بەیرووت."
🔴 ببینە چۆن درۆنەکانی حیزبوڵڵا سیستمی بەرگریی ئاسمانیی ئیسرائیل (ئایرۆن دۆم) تێدەپەڕێنن و ئامانجەکانیان دەپێکن
— Rudaw (@Rudawkurdish) October 13, 2024
بەگوێرەی میدیای ئیسرائیل، 67 کەس بریندار بوون کە بەشێکیان سەربازن. pic.twitter.com/sCJiEAz0mw
رۆژی پێنجشەممەی رابردوو، سوپای ئیسرائیل بۆردوومانی نێوەڕاستی بەیرووتی کرد و لانیکەم 22 کەسی کوشت.
حیزبوڵڵا هەروەها رایگەیاند: "هێرشەکە وەک پاڵپشتییەک لە گەلی فەلەستین، کەرتی غەززە و بەرگریی بەشەرەفیان، هەروەها وەک بەرگرییەک لە گەلی لوبنان کرا."
بەگوێرەی میدیای ئیسرائیل، برینی نۆ لە بریندارەکان سەختە و سوپای ئیسرائیل لێکۆڵینەوەی لە شکستی بەرپەرچدانەوەی درۆنەکان دەستپێکردووە.
حیزبوڵڵا بە درۆن هێرش دەکاتە سەر ناوچەیەکی نێوەڕاستی ئیسرائیل؛ بەپێی زانیارییەکان، 40 کەس بریندار بوون pic.twitter.com/Vw6cBlQA9F
— Rudaw (@Rudawkurdish) October 13, 2024
رادیۆی سوپای ئیسرائیل لە دوای هێرشەکە رایگەیاند: "سێ کەس کوژراون." تاوەکو ئێستا هیچ لێدوانێکی فەرمی لە سوپای ئیسرائیلەوە نەهاتووە.
ناوچەی بنیامینا دەکەوێتە نێوان شاری حەیفا و تەلئەڤیڤ. نزیکەی 16 هەزار لەس لەو ناوچەیە دەژین و نزیکەی 70 کیلۆمەتر لە سنووری باشووری لوبنانەوە دوورە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ