بوومەلەرزەیەک دەریای نێوەڕاستی هەژاند

 

 

سەرۆکایەتیی کارەساتی لەناکاو و فریاگوزاریی تورکیا-ئافاد رایگەیاند، کاژێر 07:34 خولەکی بەیانی ئەمڕۆ هەینی، 12ـی تەممووز لە دەریای نێوەڕاست بوومەلەرزەیەک بە گوڕی 4 پلەی رێختەر روویدا. 

 

بەگوێرەی راگەیێندراوەکەی ئافاد، بوومەلەرزەکە لە قووڵایی 7.91 کیلۆمەتر تۆمارکراوە. 

 

لە چەند رۆژی رابردوودا روودانی بوومەلەرزە لە تورکیا و باکووری کوردستان زیاد بووە. رۆژی پێنجشەممە، 11ـی تەممووز لە پارێزگای ئافیۆنکاراهیسار ـی تورکیا سێ بوومەلەرزە بە گوڕی چوار پلەی رێختەر روویدا.

  

لە باکووری کوردستانیش ماوەی چەند رۆژێکە رۆژانە بوومەلەرزە لە پارێزگاکانی مەڕەش و مەڵەتی باکووری کوردستان تۆمار دەکرێن.

 

لە شەشی شوباتی 2023 دوو بوومەلەرزە بەگوڕەکانی 7.7 و 7.6 پلەی رێختەر لە پارێزگای مەرەشی باکووری کوردستان روویاندا. بوومەلەرزەکان 10 پارێزگای تورکیا و باکووری کوردستانیان هەژاند. 

 

بەگوێرەی ئاماری فەرمیی دەوڵەتی تورکیا، زیاتر لە 53 هەزار کەس بەهۆی هەردوو بوومەلەرزەکە گیانیان لەدەستدا.